Papa Racinger do të lutet për Mbretin Abdallah të Jordanisë si edhe për fëmijët e
Gazës që kanë vdekur apo janë jetimë.
(05.05.2009 RV)Gjatë shtegtimit të vet në Lindje të Mesme, Papa Racinger do
të lutet gjithashtu edhe për Mbretin Abdallah të Jordanisë, mbret i cili posë tjerash
gëzon edhe titullin e pasardhësit të profetit Muhamet. Po ashtu Ati i Shenjtë do të
lutet edhe për fëmijët e Gazës “që kanë vdekur apo kanë mbetur jetimë dhe jetojnë
në varfëri dhe frikë”. Kjo thuhet ndër të tjera, në librin me liturgjitë që do të
kryesohen dhe do të kremtohen nga Papa Benedikti XVI në Lindje të Mesme. Disa
nga temat kryesore të udhëtimit të Papës janë paqja dhe pajtimi, dy fjalë, këto kuptimplote
që do të shoqërojnë krejt udhëtimin e Atit të Shenjtë në Lindje të Mesme. Edhe vetë
shprehja “Lum pajtuesit se do të quhen bijtë e Hyjit”, - një shprehje që shoqëron
çdo faqe të librit të liturgjive të këtij udhëtimi,- është shumë domethënëse. Po ashtu
shumë kuptimplote do të jenë edhe disa lutje, si përshembull ajo gjatë Meshës së datës
10 maj në stadiumin e kryqyetit jordanez, Aman. Pikërisht në këtë Meshë do të ketë
lutje për paqën në Lindje të Mesme, në Palestinë, në Irak, dhe Liban.” “Le t’i kërkojmë
Zotit, thuhet në tekst, që të përhapë paqën në të gjitha zemrat, në mënyrë që drejtësia
të triumfojë në këto kombe të Lindje së Mesme dhe që të arrihet paqja.” Ndërsa
lutja e tretë gjatë kësaj Meshe do t’i kushtohet Mbretit Abdallah II Ibën Al Husein
dhe qeverisë së mbretërisë hashemite të Jordanisë, që Zoti t’i udhëzojë të veprojnë
gjithnjë në të mirë të Jordanisë dhe të nënshtetasve të saj”.