Sot u kremtua Dita e 46-të e lutjes për thirrje meshtarake e rregulltare
(03.05.2009 RV)Titullohet ‘Besimi
në nismën e Hyjit dhe përgjigjja njerëzore” mesazhi i Atit të Shenjtë kushtuar
kësaj dite. E fton mbarë popullin e Hyjit të reflektojë për thirrjen e Jezusit drejtuar
dishepujve të vet: “Lutjuni, pra Zotërisë së të korrave, të dërgojë korrtarë në të
korrat e veta” (Mt 9, 38). Lutuni! Ftesa e Zotit – vëren Ati i Shenjtë - na
kujton se lutja për thirrjet meshtarake duhet të jetë e pandërprerë dhe besimplote.
E kjo sepse vetëm po të frymëzohet nga lutja, bashkësia e krishterë mund të ketë më
shumë besim e më shumë shpresë në ndihmën hyjnore. Thirrja për rrugën e meshtarisë
dhe të jetës së përkushtuar– shpjegon Ati i Shenjtë në mesazh - është një dhuratë
e veçantë hyjnore. Përfshihet në planin e dashurisë dhe të shëlbimit që ka Hyji për
çdo njeri dhe për mbarë njerëzimin. Shën Pali Apostull, të cilin e kujtojmë në mënyrë
të posaçme sivjet, në dymijë vjetorin e lindjes, në Letrën drejtuar Efezianëve, pohon:
“Qoftë bekuar Hyji, Ati i Zotit tonë Jezu Krishtit, i cili na bekoi me çdo bekim shpirtëror
në qiell në Krishtin. Në Të na zgjodhi para krijimit të botës që të jemi të shenjtë
e të papërlyer para Tij në dashuri” (Ef 1, 3-4). Në thirrjen e gjithëmbarshme
për të ecur në rrugën e shenjtërisë, del në pah nisma e veçantë e Hyjit, me anë të
së cilës zgjedh disa për ta ndjekur më për së afërmi Birin e tij Jezu Krishtin. Mësuesi
hyjnor i thirri personalisht Apostujt “që t’i kishte më pranë e t’i niste të predikonin,
duke pasur pushtetin t’i dëbojnë djajtë” (Mk 3, 14-15); ata, nga ana e tyre,
u bashkuan me dishepuj të tjerë, bashkëpunëtorë besnikë në shërbesën misionare. Kështu,
duke iu përgjigjur thirrjes së Zotit dhe ndikimit të Shpirtit Shenjt, aradhe të panumërta
priftërinjsh dhe rregulltarësh gjatë shekujve ia kushtuan gjithë jetën Krishtit në
Kishën e Tij. Ta falënderojmë Zotin – na fton Ati i Shenjtë - që edhe sot vazhdon
të thërrasë punëtorë të rinj në vreshtin e vet. E duke na kujtuar se në disa zona
të tokës vijon të ketë mungesë shqetësuese meshtarësh e se vështirësitë dhe pengesat
e shoqërojnë edhe sot Kishën në rrugët e pafundme të botës, Papa na siguron se në
përpjekjen për ndërtimin përfundimtar të Mbretërisë Hyjnore na prin vetë Zoti, që
zgjedh e fton ta ndjekin njerëz të kulturave, racave e moshave të ndryshme, sipas
planeve të pashqyrtueshme të dashurisë së tij të mëshirshme. Le të kumbojnë sot në
shpirtin e të gjithë besimtarëve, fjalët e Jezusit, që na i kujton Papa në mesazh:
“Ju nuk më zgjodhët mua, por unë ju zgjodha ju dhe ju caktova të shkoni e të jepni
fryt e fryti juaj të qëndrojë” (Gjn 15, 16).