2009-04-28 14:24:56

Հայաստան Համահայկական Հիմնադրամի Տնօրէնի Այցը Հայ Կաթողիկէ Պատրիարքարան


Լիբանան – Շաբաթ 25 Ապրիլ 2009-ին, Հայ Կաթողիկէ Պատրիարքարան այցելեց Հայաստան Համահայկական Հիմնադրամի գործադիր տնօրէնը՝ Արա Վարդանեան։ Ան ընդունուեցաւ Տանն Կիլիկիոյ Կաթողիկէ Հայոց Ամենապատիւ եւ Գերերջանիկ Տէր Ներսէս Պետրոս ԺԹ Կաթողիկոս Պատրիարքին կողմէ։ Անոր կ'ընկերակցէին Գերմանիոյ Հայաստան Համահայկական Հիմնադրամ Յանձնախումբի ատենապետը՝ Ժիլպէր Մոմճեան եւ Լիբանանի Հայաստան Համահայկական Հիմնադրամ Յանձնախումբի ատենապետը՝ Սարգիս Արմէնեա։ Հոգեւոր Տիրոջ բարի գալուստի խօսքէն ետք խօսուեցաւ Հայաստան Համահայկական Հիմնադրամի զանազան ծրագիրներու եւ գործունէութիւններուն մասին։ Պրն Արա Վարդանեան իր խօսքին մէջ ըսաւ թէ Երեւանի գրասենեակին մէջ կը գործեն 44 հոգի, որոնք զանազան ենթաբաժանումներ ունին, յայտնելով թէ՝ Հիմնադրամի ներդրումին մեծ մասը կու գայ Ռուսիայէն եւ Հայաստանէն. ան նաեւ ըսաի որ Մայիս ամսոյն, Հայաստանի մէջ պիտի կայանայ Հայաստան Համահայկական Հիմնադրամի Հոգաբարձական Խորհուրդի նիստը ։ Հոգեւոր Տէրը բարձր գնահատեց հիմնադրամին տարած աշխատանքը, որ կը ձգտի մեր հայրենիքի բարօրութեան, հաստատելով որ սփիւռքը միշտ պատրաստ է, օժանդակելու եւ թիկունք կանգնելու՝ ՜՜Հայրենիքին՝՝։








All the contents on this site are copyrighted ©.