(27.04.2009 RV)Rasti i parë u kap
në Spanjë, por edhe në vende të tjera janë duke u bërë kontrolle. Bashkimi Evropian
do të mbledhë të enjten ministrat e shëndetësisë, ndërsa qeveria meksikane e jep të
rritur numrin e të vdekurve, që dyshohet të kenë qenë sëmurë me këtë lloj gripi, përzierie
e gripit të pulave, të derrit e të njeriut. Departamenti amerikan i Shëndetësisë parashikon
raste më të rënda dhe mundësinë që të ketë të vdekur edhe në SHBA-të. Një rast është
gjetur edhe në Hong Kong. Alarmojnë deklaratat nga Gjeneva të zv.drejtorit të Organizatës
Botërore të Shëndetësisë, Fukuda, sipas të cilit “ka mundësi që virusi të ndryshojë,
duke u bërë më i rrezikshëm për popullsinë”. Në Meksikë, viktimat e kanë kaluar
njëqindëshin, ndërsa mëse 1.600 vetë janë shtruar në spital. Kryiepeshkvi i Qytetit
të Meksikos, kardinali Norberto Rivera Karrera, “i shqetësuar dhe i trishtuar për
gjendjen”, lajmëroi se do të pezullohen deri në një urdhër të ri, të gjitha meshët
në kryeqytet. Besimtarët mund të shkojnë nëpër kisha për t’u lutur, por mesha duhet
ndjekur përmes radios o televizionit. Për sqarime të mëtejshme iu drejtuam koordinatorit
italian të departamentit të ambientit e shëndetit për Organizatën Botërore të Shëndetësisë,
Roberto Bartolini: Ky virus i gripit të derrit i është transmetuar njeriut
dhe ka marrë karakteristika të tilla, për të cilat duket se është i aftë të përhapet
edhe mes personave, që nuk janë në kontakt të drejtpërdrejtë me derrat. Prandaj, transmetohet
nga njeriu në njeri. Aktualisht, virusi shkakton bronkopolmonit të rëndë dhe ka vdekshmëri
të lartë. A ekziston rreziku i pandemisë, pra i përhapjes aq të madhe të
virusit, sa të shkaktojë vdekjen e miliona personave? Sa herë që shfaqet një
virus i ri me karakteristika të reja, që infekton njeriun siç nuk ka bërë më parë,
ekziston gjithnjë kjo mundësi. Kjo është arësyeja për të cilën ne po kontrollojmë
gjendjen, sëbashku me strukturat e SHBA-ve, të Meksikës, të Kanadasë, për të kuptuar
se deri ku arrin virusi: vdekshmëria dhe agresiviteti i tij. Por, në këtë moment,
nuk jemi në gjendje të themi nëse është fillimi i ndonjë pandemie, apo nëse është
një virus, që po shkakton, të themi, bërthamën e parë të një pandemie. Duhet të jemi
shumë të kujdesshëm, të presim, të kontrollojmë me vëmendje situatën dhe zhvillimin
e saj.