Papa mësuesve të fesë, që i priti në Vatikan: përmasa fetare e bën njeriun më njeri.
(26.04.2009 RV)“Larg së qeni ndërhyrje
apo kufizim i lirisë”, prania e mësuesve të fesë në shkollën italiane është një shembull
i mirë i asaj fryme pozitive, që bën të mundur bashkëjetesën civile konstruktive,
bazuar mbi respektin dhe dialogun e vërtetë, vlera këto, për të cilat ka gjithnjë
nevojë çdo vend. Kështu theksoi sot Benedikti XVI në përfundim të Takimit, që me iniciativën
e Konferencës Ipeshkvnore Italiane, mblodhi në Romë rreth 8 mijë mësues të fesë nga
e gjithë Italia, të cilët reflektuan këto ditë mbi temën: “Unë nuk turpërohem nga
Ungjilli”. “Përmasa fetare – kujtoi Papa – nuk është superstrukturë; ajo është
pjesë përbërëse e njeriut, që nga fëmijëria e parë; është hapja e zemrës ndaj tjetrit
dhe ndaj misterit, që karakterizon çdo marrëdhënie e çdo takim ndërmjet njerëzve.
Përmasa fetare e bën njeriun më njeri”. Mësimi i fesë i jep shkollës shpirt,
vazhdoi Ati i Shenjtë. Falë tij, shkolla e shoqëria pasurohen me laboratore të vërteta
kulture e humaniteti, në të cilat, po të kemi parasysh kontributin e krishterimit,
njeriu bëhet i aftë të zbulojë të mirën e të ndërgjegjësohet, të kërkojë konfrontimin
e ta bëjë më të mprehtë sensin kritik, të shqyrtojë të kaluarën për të kuptuar më
mirë të sotmen e për t’u projektuar me vetëdije drejt së ardhmes. Përmasa fetare është
pjesë e kulturës, kontribuon në formimin e përgjithshëm të njeriut dhe i bën atij
të mundur shndërrimin e njohurive në dituri për jetën. Pikërisht në këtë udhëkryq,
në të cilin takohen prirja universale drejt së vërtetës dhe dëshmija dymijëvjeçare
e besimtarëve të fesë, majat e jashtëzakonshme të njohurive e të arteve, që ka fituar
shpirti njerëzor dhe pasuria e mesazhit të krishterë, gjen vend shërbimi i çmuar i
mësuesve të fesë, sipas Papës Racinger. Në përfundim të takimit të djeshëm, Ati i
Shenjtë u uroi mësuesve të fesë, që të mos turpërohen kurrë nga Ungjilli e që ai Zot,
të cilin ua mësojnë fëmijëve në shkollë, të jetë me të vërtetë pikë referimi edhe
për jetën e tyre!