Octava Dies: Editorial i Atë Federiko Lombardit Kushtuar ‘Rregullës së Françeskut’.
(25.04.2009 RV)Këto ditë familja e madhe françeskane u mblodh në Kapitullin
e Rrogozave e, më 18 prill, u prit në Kastel Gandolfo nga Papa Benedikti XVI. Ati
i Shenjtë i priti me dashuri bijtë e Shën Françeskut e, duke u kujtuar zanafillën
e Urdhërit e miratimin gojor të Rregullës së parë nga ana a Papës Inoçenci III, Ati
i Shenjtë nënvizoi me forcë: “Françesku mund të mos kishte ardhur tek Papa. Grupe
të shumta rregulltare formoheshin asokohe e disa prej tyre i kundërviheshin Kishës
si institucion ose, së paku, nuk e kërkonin miratimin e saj. Ndërsa ai mendoi menjëherë
të nisej për të lëshuar në duart e ipeshkvit të Romës, pasardhësit të Shën Pjetrit,
veten e shokët e vet. E kjo flet qartë për shpirtin e tij të vërtetë kishtar. Atë
‘ne’ të vogël, që nisi me vëllezërit e parë, e konceptoi që në fillim brenda asaj
‘ne’ të madhe që ishte Kisha universale”. E pikërisht mbi këto fjalë të Papës
e vë theksin drejtori ynë i përgjithshëm, Atë Federiko Lombardi. Ta ndjekim
editorialin e tij të kësaj fundjave:
“Kremtimi i 800-vjetorit
të miratimit papnor të rregullës së parë të jetës françeskane, ishte një ngjarje
që e meritonte fjalimin e bukur të Papës mbajtur më 18 prill, si dhe përsëritjen
– në praninë e tij – të kushteve rregulltare nga shumë përfaqësues të familjeve françeskane. Të
gjithë shenjtorët e Kishës e morën Ungjillin si rregull të jetës së tyre, por në figurën
e Shën Françeskut ai shkelqen me një tejdukshmëri të posaçme, deri në plagët e mundimeve
e të dashurisë, që pasqyrojnë plagët e Krishtit. Në varfërinë, thjeshtësinë e dashurinë
e Shën Françeskut, populli i krishterë njohu gjithnjë me lehtësi frymëzimin e vërtetë
ungjillor e, edhe përtej kufijve të Kishës, njerëz të besojmave të ndryshme fetare
e humane, e kapën menjëherë këtë mesazh të vërtetë e të fuqishëm dashurie e paqeje. Një
karizmë e jashtëzakonshme, pra, që i kapërcen kufijtë e kohës e që iu nënshtrua që
në fillim gjykimit të autoritetit të Kishës, për të renditur – siç tha Papa – atë
‘ne’ të vogël të bashkësisë françeskane në fasha, me një ‘ne’ të madhe, atë të Kishës,
që është një e vetme e universale. Sigurisht, fekonditeti i karizmës françeskane u
sigurua e u shumëfishua me autoritet. “Shko Françesk, rindërtoje Kishën
time!” - i thotë i Kryqëzuari Varfanjakut. “Shkoni e vijoni ta rindërtoni shtëpinë
e Zotit, Kishën e tij!” u thotë Benedikti XVI Bijve të Shën Françeskut, duke i ftuar
ta shpëtojnë çdo njeri nga gërmadhat e mëkatit e t’i ndihmojnë barinjtë e Kishës për
ta mbarështuar grigjën e Zotit. Freski e përhershme e një thirrjeje, që
është dhuratë për të gjithë. Ungjilli i vënë në jetë, për ta mbajtur gjithnjë të re
Kishën e për t’i dhuruar paqen familjes njerëzore!”.