Imzot Tomazi denoncon lidhjet ndërmjet racizmit e varfërisë, diskriminimet kundër
të krishterëve e eugjenetikën
(24.04.2009 RV)Përfunduan sot në
Gjenevë punimet e Konferencës së OKB-së kundër racizmit, pas miratimit të rezolutës
tri ditë më parë. Kombet e Bashkuara përjashtuan dje nga konferenca dy grupe hebraike
dhe një iranian. Bashkimi Francez i Studentëve hebrenj dhe grupi Coexist, ndërprenë
të hënën fjalimin e presidentit iranian, që shkaktoi kritika e debate në të gjithë
botën. Ndërsa Instituti iranian Neda shpërndau material propagandistik ekstremist.
Në konferencë foli edhe përfaqësuesi i Vatikanit, imzot Silvano Maria Tomazi,
i cili uroi që takimi të shënojë një hap përpara në luftën kundër diskriminimeve racore,
ksenofobisë dhe intolerancës. Nga ana tjetër, ai nënvizoi se 8 vjet pas Konferencës
së Durbanit, impenjimi ndërkombëtar kundër racizmit mbetet akoma jo i plotë. Pasi
përsëriti qëndrimin e Selisë së Shenjtë kundër deklaratave ekstremiste të Iranit,
prelati theksoi nevojën për të luftuar diskriminimet kundër grave e fëmijëve, shpesh
viktima trafikësh e skllavërimi, diskriminimet kundër emigrantëve pa dokumenta, refugjatëve,
të huajve në përgjithësi, që zgjojnë padrejtësisht frikë e madje edhe akte barbare,
deri në genocid e spastrim etnik. Në veçanti, vëzhguesi i përhershëm i Selisë së Shenjtë
në selinë e OKB-së në Gjenevë foli për efektet shkatërruese të lidhjes ndërmjet racizmit
e varfërisë. Ta dëgjojmë në mikrofonin tonë: Ekziston një lidhje e drejtpërdrejtë
mes varfërisë ekstreme dhe diskriminimit, prandaj duhet të gjejmë mënyrën që të respektohen
të gjitha të drejtat e njeriut, duke përfshirë ato ekonomike e shoqërore. Sigurisht,
kjo krizë ekonomike i bën të vujanë edhe më shumë të varfërit dhe i lë në kushte,
që u hapin rrugën diskriminimeve më të mëdha. Në Konferencën e Gjenevës u
fol shumë për diskriminimet fetare, por jo për ato kundër të krishterëve… Po.
Në këtë moment, në botë, sipas të dhënave, 200 milion të krishterë vuajnë nga diskriminimi,
burgosja e madje edhe dënohen me vdekje për hir të fesë. Në botë, bashkësia
më e madhe fetare që diskriminohet është ajo e krishterë. Ju folët edhe për
eugjenetikën e diskriminimet para lindjes… vendoset kush duhet të vijë në botë e kush
jo… Po. Është e qartë se e drejta themelore që mbizotëron mbi të gjitha është
e drejta për jetën e, kur kjo e drejtë mohohet, si në rastin e abortit, kemi të bëjmë
me formën më radikale të diskriminimit. Si i gjykoni rezultatet e Konferencës? Miratimi
i tekstit përfundimtar të Konferencës është shenjë shumë pozitive dhe rezultat jo
i vogël, pasi u deshën muaj bisedimesh për të arritur në një tekst të pranueshëm nga
grupi i shteteve perëndimore, nga ai i shteteve islamike e nga shtete të tjera, që
marrin pjesë në Kombet e Bashkuara. Prandaj, do të thosha se ky është fryti i një
përpjekjeje kolektive jo pak të rëndësishme, premtuese për të ardhmen, në kuptimin
që marrëveshja e arritur për disa tema si liria e shprehjes, mbrojtja e të drejtave
të besimtarëve e jo besimtarëve, njohja e antisemitizmit, dënimi i kristianofobisë
e i islamofobisë, nevoja për të kujtuar Holokaustin si një tragjedi që duhet të na
nxisë të parandalojmë fatkeqësi të tilla, këto e pika të tjera të marrëveshjes hapin
dyert për të zvogëluar distancat edhe në fusha të tjera: si për shembull, në Këshillin
e të drejtave të njeriut, ku tani mund të gjejmë një frymë më të mirë bashkëpunimi
për të përballuar problemet e sotme.