Sulmohet një Kishë në shtetin indian të Maharashtrës.
(22.04.20089 RV)Një grup fanatikësh hinduistë sulmuan e dëmtuan një kishë protestante
në fshatin Saoner, 40 kilometra larg Nagpurit, në shtetin indian të Maharashtrës.
Dhuna- njofton AziaNjuz – ndodhi të dielën, më 19 prillin e kaluar, në Douglas Memorial
Church, ndërsa të krishterët luteshin gjatë një kremtimi fetar. Dy gra, që u përpoqën
t’i ndalonin sulmuesit, mbetën të plagosura. Organizatat kryesore hinduiste, Vishwa
Hindu Parishad dhe Bajrang Dal, nuk e pranuan autorësinë e sulmit, por pohuan se u
krye nga hinduistët e zemëruar për shkak se shumë banorë të zonës po ndërrojnë fe.
Gjatë sulmit u grisën disa libra lutjesh dhe një Bibël. E, pak minuta para sulmit,
disa anëtarë të organizatës hinduiste Bajrang Dal, dorëzuan në polici një letër, përmes
së cilës kërkohej ndërhyrja kundër ndërrimit të fesë dhe një lëvizje e fuqishme kundër
Kishës, sepse interesohet posaçërisht për shtresat më të ligështa të shoqërisë. Sipas
Abraham Matasit, zëvendës-kryetar i Komisionit për pakicat, policia duhet të kishte
ndërhyrë menjëhere, sepse “E kishte për detyrë të vepronte, që grupi të mos arrinte
tek Kisha”. Edhe të krishterët e Mumbait, kryeqytet i Mahashatrës, u bashkuan me
protestën, sapo morën vesh lajmin e sulmit kundër Kishës protestante. Kryeipeshkvi
i Nagpurit, imzot Abraham Viruthakulangara pohoi se në Nagpur ka pasur gjithnjë mirëkuptim
ndërmjet bashkësive të ndryshme. Armiqësia lindi si pasojë e akteve të dhunës – shtoi
prelati - duke theksuar se sulmet tregojnë nënvleftësim të plotë për rendin ligjor.