Miratohet njëzëri rezoluta përfundimtare e Konferencës “Durban 2” mbi racizmin
(22.4.2009 RV)Konferenca e OKB-së
mbi racizmin “Durban 2” miratoi dje në Gjenevë dokumentin përfundimtar, me një akt
demonstrativ, njëzëri, para ditës së premte, kur rezoluta duhej të miratohej normalisht.
Është përgjigjia e pjesëmarrësve kundër sulmeve të presidentit iranian, Mahmud Ahmadinexhad,
i cili akuzoi si “regjim racist” Izraelin, vetëm dy ditë më parë. Gjithsesi, konferenca,
e bojkotuar nga dhjetë vende, do të vazhdojë punimet deri të premten, sipas parashikimit.
Nga SHBA-të, që mungojnë në Gjenevë, presidenti Barak Obama dënoi sërish sot pohimet
e Ahmadinexhadit, por theksoi se Uashingtoni do t’i vazhdojë përpjekjet për dialog
me Teheranin. Reagimi ndaj rezolutës është në përgjithësi pozitiv. Ajo është miratuar
nga të gjtha vendet anëtare të OKB-së, me përjashtim të dhjetë prej tyre. Në tekst,
deklaroi ministri i jashtëm francez, Bernard Kushner “figuron çdo gjë që dëshirojmë,
gjithçka duan vendet perëndimore” mbi antisemitizmin, luftën kundër diskriminimit
të personave, mbi lirinë e shprehjes etj. “Flitet mbi genocidin, holokaustin, të drejtat
e grave, trafikun e qënieve njerëzore, mbi të sëmurët nga Sida e ata me të meta fizike”,
nënvizoi Kushner. Teksti përfundimtar kaloi nëpër një debat shumë të fortë ndërmjet
vendeve myslimane e atyre perëndimore, për shkak të divergjencave për çështjen e Lindjes
së Mesme dhe për atë të “fyerjes së feve”. Siç kërkuan vendet perëndimore, rezoluta
nuk e përmend as Izraelin, as fyerjen e feve. Paragrafi mbi Holokaustin u ruajt, pavarësisht
nga protestat e Iranit. Dokumenti ndalet në aspekte të shumta të racizmit e të intolerancës,
si të drejtat e pakicave etnike dhe të popujve indigjenë, luftën kundër ksenofobisë
dhe diskriminimit ndaj emigrantëve, refugjatëve, grave dhe romëve. Të dëgjojmë
Vëzhguesin e përhershëm të Selisë së Shenjtë në selinë e OKB-së në Gjenevë, imzot
Silvano Maria Tomazi: Mendoj se të gjithë u shqetësuan për të dhënë një
shenjë të qartë se duhet të orientohemi mbi thelbin e dokumentit e të lemë mënjanë
interpretime apo ngjarje politike të tjera. Mesazhi që jep dokumenti përfundimtar
është se format e reja të racizmit, ksenofobisë e intolerancës janë të papranueshme
dhe, se propozimet e bëra për të luftuar racizmin përmes mekanizmave të reja, përmes
vullnetit të rinovuar të bashkësisë ndërkombëtare është rruga ku duhet të ecim. Prandaj,
mbyllja e këtij kapitulli ka shkaktuar shumë kënaqësi dhe e ka liruar disi atmosferën
e Konferencës. Pra, imzot Tomazi, ju e gjykoni si pozitive përmbajtjen e rezolutës? Dokumenti
nuk është i përsosur, por respekton pikat kryesore të të drejtave të njeriut, hap
rrugën për të vazhduar bisedimet në të ardhmen mbi disa tema, të cilat, për herë të
parë, u pranuan universalisht. Nëse vazhdohet me vullnetin e mirë për të biseduar
e për të mos hyrë në formula të veçanta paragjykimesh për një shtet apo tjetrin, ose
diskriminimesh ndaj një grupi fetar apo tjetrit, sigurisht që mund të përmirësohen
kushtet për luftën kundër çdo formë e shfaqje të racizmit.