Me rastin e ditëlindjes e të përvjetorit të papnisë, Benedikti XVI mori urimet edhe
nga besimtarë të feve të tjera.
(20.04.2009 RV)Të shumta zërat e brohoritjet për ditëlindjen dhe papninë e
Benediktit XVI, ardhur në Vatikan nga mbarë bota. Vlejnë të kujtohen posaçërisht urimet
e shumta nisur nga Bangladeshi, ku vetëm 1% e popullsisë është katolike. “Dëshirojmë
ta shikojmë Papën mes nesh” – pohon murgu i nderuar budist Dhirbagshha Bikkhu - sepse
është Ati i paqes”. E njëkohësisht me urimet e murgut budist – siç njofton Agjensia
AziaNjuz - arrijnë edhe urimet e myslimanëve si Ubaidur Rahman Khan Nadwi, zevendës-redaktor
i gazetës Daily Inqilab, që thekson: “Ne e vlerësojmë impenjimin e vendosur të Papës
për paqen e harmoninë ndërmjet feve; kemi të njëjtin shqetësim për shtetet, që deklarojnë
luftë, duke përhapur politika djallëzore, të cilat synojnë t’i shtypin myslimanët.
Kemi nevojë për zërin e tij, që mbron të vërtetën e paqen e lutemi që të ketë jetë
të gjatë”. Urime Benediktit XVI i bënë edhe besimtarët hinduistë. Nga Instituti
Brama Fumari i Dhakës, së bashku me urimet, theksohet se “Papa është i shenjtë e kudo
të shkojë nëpër botë, mbart me vete rezultate pozitive”.