(20.04.2009 RV) Nëntë Vende bojkotojnë konferencën botërore të Gjenevës organizuar
nga OKB-ja mbi racizmin, diskriminim racor e ksenofobinë. Konferenca që u hap sot
në Zvicër, e pa botën të ndarë Pas bojkotimeve, polemikat. Konferenca e OKB-së
mbi racizmin u hap me lajmin se Izraeli tërhiqte ambasadorin e tij në Bernë, në shenjë
proteste për takimin e së dielës mbrëma ndërmjet presidentit zviceran dhe atij iranian.
Mahmud Ahmadinexhad nuk mungoi të përsërisë opinionin e tij ideologjik kundër Izraelit
edhe në konferencë. Pa e përmendur me emër, edhe sot pasdite, ai denoncoi “formimin
e një qeverie raciste në Lindjen e Mesme”, pas vitit 1945. Delegatët e Bashkimit Evropian,
siç kishin premtuar, dolën nga salla. Që kur arriti në Gjenevë, kreu i Teheranit e
quajti Tel Avivin “flamurtar të racizmit”. Ndërkaq, Sekretari i Përgjithshëm
i OKB-së, Ban Ki-Mun i hapi punimet pesëditëshe duke u ankuar për mungesat. “Jam thellësisht
i pakënaqur – theksoi Ban Ki-Mun – që disa vende kanë vendosur të mos vijnë. E shpresoj
të mos mbeten larg gjatë”. Konferenca mbi racizmin, diskriminimin racor dhe ksenofobinë
u bojkotua nga SHBA-të, Italia, Australia, Kanadaja, Hollanda, Polonia, Zelanda e
Re dhe Gjermania. Të gjitha këto vende kanë frikë se mos takimi shndërrohet në një
proces në distancë kundër Izraelit, ashtu siç ndodhi në mbledhjen e parë në qytetin
afrikanojugor të Durbanit, ku Izraeli u akuzua si “shtet racist”. Deklarata përfundimtare,
hartuar nga diplomatët dhe miratuar të premten e kaluar, pas bisedimesh të vështira,
nuk e përmend Izraelin dhe as territoret e pushtuara palestineze. Gjithashtu, nuk
bën pjesë në të as koncepti i “fyerjes së feve”, që u mbrojt nga disa vende myslimane,
por u kundërshtua nga perëndimorët, të cilët e konsideruan si përpjekje për kufizimin
e lirisë fetare. Ndërkaq, nuk u ndryshua paragrafi mbi Holokaustin dhe mbi nevojën
për të mos e harruar, pavarësisht nga opinioni i kundërt i Teheranit.