Аляксандар Жлудка-- лаўрэат узнагароды імя Льва Сапегі
Кандыдат навук Аляксандар Жлутка зь Менску стаў ляўрэатам узнагароды імя Льва Сапегі,
якая была ўручаная 4 красавіка ў Варшаўскім унівэрсытэце. Аляксандар Жлутка зьяўляецца
гісторыкам літаратуры, клясычным філёлягам. Ён навучаўся ў Львоўскім унівэрсытэце,
а пазьней у Акадэміі навук Беларусі. Ён працаваў у Навукова-асьветніцкім цэнтры імя
Францішка Скарыны й у Беларускім гуманітарным ліцэі. Зьяўляецца рэдактарам часопіса
„Наша вера”. Адзін зь ініцыятараў узнагароды імя Льва Сапегі прафэсар Ян Маліцкі
патлумачыў Польскаму радыё, чаму сёлетнім ляўрэатам стаў Аляксандар Жлутка. Аляксандар
Жлутка'сказаў ён- зьяўляецца вельмі вядомым клясычным філёлягам у Беларусі.
Там гэта мае асаблівае значэньне. Напрыклад, у Польшчы ёсьць дзесяткі, а нават сотні
клясычных філёлягаў. У сваю чаргу ў Беларусі Аляксандар Жлутка належыць да кола некалькіх
клясычных філёлягаў. А дасьледваньне гісторыі ня можа адбывацца без клясычнай філялёгіі.
Дадаткова гэта чалавек з такога пакаленьня, якія ад пачатку 90-х гадоў былі моцна
заангажаваныя ў перамены ў Беларусі. У гэтым выпадку навука спалучаецца з грамадзкай
дзейнасьцю. Гэта чалавек, які ў свой час езьдзіў выкладаць лацінскую мову ў Вышэйшую
духоўную семінарыю ў Пінску. Мы маем дачыненьне з чалавекам, які зьяўляецца рэдактарам
часопіса "Наша вера". Як бачна, гэта навуковец, які ня толькі сядзіць у кабінэце над
сваімі лацінскімі тэкстамі. Гэта навуковец, для якога найважнейшай зьяўляецца навука
ў найшырэйшым значэньні гэтага слова. Гэта чалавек, які думае пра свой народ і грамадзтва.
Ён, як навуковец, хоча нешта гэтаму народу даць і ўнесьці ў яго разьвіцьцё. Узнагарода
імя Льва Сапегі за галоўную мэту ставіць уганароўваньне асобаў за кшталтаваньне й
разьвіцьцё грамадзкай супольнасьці ў Беларусі, а таксама за будаваньне незалежнай
і дэмакратычнай Беларусі, накіраванай у бок Эўропы. Згодна з прынцыпамі ўзнагароды,
ляўрэат будзе рэгулярным госьцем польскіх унівэрсытэтаў, дзе будзе праводзіць шэраг
выкладаў на тэму Беларусі.