Sekretaria e Shtetit të Vatikanit shpreh keqardhjen per protestën e Belgjikës pas
fjalëve të Papës për Sidën.
(17.04.2009 RV)Ambasadori i Mbretërisë
së Belgjikës, sipas udhëzimeve të Ministrit të Punëve të Jashtme, i bëri të njohur
Sekretarit të Vatikanit për Marrëdhëniet me Shetet, Rezolutën me të cilën Dhoma e
Përfaqësuesve e vendit të tij kërkoi nga qeveria belge të dënojë deklaratat e papranueshme
të Papës me rastin e shtegtimit të tij në Afrikë e të protestojë zyrtarisht pranë
Selisë së Shenjtë. Takimi u mbajt me 15 prill.
Sekretaria e Shtetit e priti
me keqardhje të thellë një hap të tillë, të pazakontë në marrëdhëniet diplomatike
ndërmjet Selisë së Shenjtë e Mbretërisë së Belgjikës, duke u çuditur se si Asambleja
Parlamentare e quajti të arsyeshme ta kritikojë Atin e Shenjtë mbi bazën e separatit
të një interviste të prerë e të shkëputur nga konteksti, e cila u përdor nga disa
grupe me qëllim të qartë frikësues, gati sikur të donin ta bindnin Papën të mos shprehet
për disa tema, spikatja morale e të cilave është e natyrshme, është të mësosh doktrinën
e Kishës. Siç dihet, Ati i Shenjtë, duke iu përgjigjur një pyetjeje lidhur me
efektshmërinë dhe karakterin realist të qëndrimeve të Kishës në luftën kundër Sidës,
deklaroi se rrugëzgjidhja duhet kërkuar në dy drejtime: nga njëra anë, në humanizimin
e seksualitetit e, nga ana tjetër, në miqësinë dhe gatishmërinë për t’i ndihmuar njerëzit
që vuajnë, duke nënvizuar edhe impenjimin e Kishës në të dyja fushat. Pa një përmasë
të tillë morale dhe edukative, beteja kundër Sidës nuk mund të fitohet. Ndërsa
në disa vende të Evropës fillonte një fushatë e tërbuar mediatike e pashembullt mbi
vlerën e madhe, për të mos thënë të pakundërshtueshme, të prezervativit në luftën
kundër Sidës, na ngushëllon fakti se vlerësimet me karakter moral të Atit të Shenjtë
u kuptuan e u vlerësuan, posaçërisht nga afrikanët e nga miqtë e vërtetë të Afrikës,
por edhe nga disa anëtarë të bashkësisë shkencore. E në një deklaratë të kohëve të
fundit të Konferencës Ipeshkvnore Zonale të Afrikës Perëndimore (CERAO) shkruhet:
“Jemi mirënjohës për mesazhin e shpresës që Ati i Shenjtë erdhi t’ia besojë Kamerunit
e Angolës. Erdhi të na inkurajojë të jetojmë të bashkuar, të pajtuar, në drejtësi
e paqe, me qëllim që Kisha në Afrikë të jetë pishtar i ndritshëm shprese për jetën
e mbarë Kontinentit. E falënderojmë, prandaj, që na e propozoi përsëri të gjithëve,
me qartësi e mprehtësi, mësimin e përbashkët të Kishës në fushën e veprimtarisë
baritore me të sëmurët nga Sida”.