Shenjtorët e ditës: Sot Kisha katolike përkujtoi shenjtorët Abondi, Anastasia e Vasilika.
(15.04.2009 RV)Për Shën Abondin dimë vetëm aq sa shkruhet në Martiriologun
Romak: “Përkujtohet në Romë, në bazilikën e Shën Pjetrit. Siç dëshmon papa Shën Gregori
i Madh, qe besimtar i përvujtë, që i shërbeu kësaj Kishe”.
Shën Anastasia
është martire e shekullit I. Së bashku me Vasilikën, qe nxënëse e Apostujve
Pjetër e Pal. Me to u bashkua edhe matrona romake, Lucina. Të trija patën rol të njëjtë
në grupin e "grave të përshpirtshme" që u ngarkuan me detyrën për të varrosur trupat
e martirëve. I qëndruan pranë deri në frymën e fundit Princit të Apostujve, Shën Pjetrit
si edhe Apostullit të Popujve, Shën Palit, duke i varrosur edhe trupat e tyre të martirizuar.
Shën Anastasia, së bashku me dy shoqet e veta, e varrosi trupin e Shën Pjetrit pak
më larg cirkut të Neronit, në kodrën e Vatikanit, ku sot lartohet bazilika që mban
emrin e Tij. Ndërsa Shën Pali u varros në një nga pronat e Lucinës, buzë Tiberit,
gjatë rrugës Ostiense. E ndoqën shembullin e Apostujve deri në fund: u kapën si
të krishtera dhe u torturuan mizorisht. Pasi iu pre gjuha, trupat e tyre u coptuan
me shpata nën perandorin Neron, rreth vitit 68. Reliket e dy Shenjtoreve, të mbledhura
me nderim të thellë, siç kishin bërë ato vetë më parë, u ruajtën nga të krishterët
e parë, derisa u vendosën në Kishën romake të Shën Marisë së Paqes në Romë, ku nderohen
edhe sot.