Kisha kremton Tetëditshin e Pashkëve duke përsëritur kumtimin e gëzimit: Krishti vërtet
është ngjallur.
(14.4.2009 RV)Ditët ndërmjet së Dielës
së pashkëve e deri të dielën e ardhshme, e Diela e Mëshirës Hyjnore, quhen ‘Tetëditshi
i Pashkëve’, sepse formojnë një korpus të vetëm, në të cilin vazhdon të jehojë
me forcëbritma e gëzimit: “Krishti është ngjallur!”. Një britmë kjo, të
cilën Papa, në emër të mbarë Kishës, e përsëriti në ditët kushtuar mundimeve, vdekjes
mbi kryq e ngjalljes së Jezusit. Pashkët janë burimi e kulmi i Liturgjisë së krishterë
dhe i jetës së krishterë, sepse pikërisht në të – në ngjarjen e Pashkëve – Krishti
ka vdekur e është ngjallur dhe na dhuron vetveten në Shpirtin Shenjt. Ja se pse, gjithmonë,
qendra e këtij misteri ka mbushur zemrat, fenë dhe vetë Liturgjinë me gëzim. Ja se
pse në histori është ndjerë nevoja e përhapjes dhe e zgjatjes, në një farë mënyre,
të begatisë e plotësisë së kësaj dite, që është dita e ditëve, që na përkujton misterin
qendror të fesë së krishterë, Ngjalljen e Krishtit, përmes kremtimit të një Tetëditshi
të tërë. Po kujtojmë edhe një herë pohimin e Papës Benedikti XVI, dhënë të Dielën
e Pashkëve: “ ngjallja e Krishtit nuk është mit, as ëndërr, as teori, por një ngjarje
historike që ka ndryshuar historinë e botës, historinë e secilit prej nesh”. Po, Krishti
është ngjallur më të vërtetë: Papa “Po! Është pikërisht ky thelbi kryesor
i rrëfimit të fesë sonë; është kjo britma e fitores që sot i bashkon të gjithë. E
nëse Jezusi është ngjallur, e këndej është i gjallë, kush pra mund të na ndajë prej
tij? Kush vallë mund të na privojë nga dashuria e tij, që e mund urrejtjen dhe e mposht
vdekjen?...Ai është shpresa jonë, Ai është paqja e vërtetë e botës”.