ജീവിതം അനിശ്ചിതമാണെങ്കിലും മനുഷ്യവ്യക്തിയുടെ ഭാഗധേയത്വത്തെപ്പറ്റി നമുക്ക് ഉറപ്പുണ്ടെന്ന്,
പാപ്പാ
ജീവിതം അനിശ്ചിതമാണെങ്കിലും, മനുഷ്യവ്യക്തിയുടെ ഭാഗധേയത്വത്തെപ്പറ്റി ഒരു അനിശ്ചിതത്വവുമില്ലെന്ന് പാപ്പാ. ക്രിസ്തുവാണ് മനുഷ്യജീവന്‍െറയും, ചരിത്രത്തിന്‍െറയും അന്ത്യം. ലോകയുവജനദിനത്തിനായുള്ള കുരിശു് പാപ്പായില്‍ നിന്ന് ഓശാനദിനത്തില്‍ ഏറ്റു വാങ്ങുന്നതിന്, 2011 ലെ ആ സംഗമത്തിന്‍െറ വേദിയായ സ്പെയിനിലെ മഡ്രിഡില്‍ നിന്നെത്തിയ യുവജനങ്ങളെ തിങ്കളാഴ്ച വത്തിക്കാനില്‍ സ്വീകരിച്ചു അഭിസംബോധന ചെയ്യവെ പോപ്പ് ബെനഡിക്ട് പതിനാറാമന്‍ പ്രസ്താവിച്ചു. പ്രിയ യുവജനമെ, പാപ്പാ തുടര്‍ന്നു- ക്രിസ്തുവിന്‍െറ കാലടികള്‍ പിന്‍തുടരുക. അവിടുന്നാണ് നിങ്ങളുടെ ലക്ഷൃവും, മാര്‍ഗ്ഗവും, പ്രതിഫലവും. നിശ്ചയമായും ജീവിതം ഒരു പ്രയാണമാണ്. എന്നാല്‍ വ്യക്തമായ ലക്ഷൃമില്ലാത്ത, അനിശ്ചിതമായ ഒരു യാത്രയല്ല അത്. സ്നേഹത്താല്‍ പ്രേരിതമായി സ്വജീവന്‍ നമുക്കായി ഹോമിച്ച, നിത്യജീവന്‍െറ വാതില്‍ നമുക്കായി തുറന്നു തരുന്ന ക്രിസ്തുവിനെ ആ യാത്രയില്‍ നിങ്ങള്‍ കണുമുട്ടും. അതുല്യമായി, വ്യക്തിപരമായി അവിടുന്നു ഓരോത്തരെയും സ്നേഹിക്കുന്നു. സ്നേഹപൂര്‍വം ജീവന്‍ അവിടത്തേയ്ക്ക് സമര്‍പ്പിച്ചുകൊണ്ട് ആ സ്നേഹത്തോട് പ്രതികരിക്കുക. ജീവിതത്തിനു് അര്‍ത്ഥമേകുകയും, ബോധ്യങ്ങളെ ശക്തിപ്പെടുത്തുകയും ചെയ്യുന്ന വിശ്വാസത്താല്‍ രൂപികൃതരായി ക്രിസ്തുവിനെ നിങ്ങളുടെ സ്നേഹിതരോട് പ്രഘോഷിക്കുക. സേവിക്കപ്പെടാനല്ല മറിച്ച് സേവിക്കുവാനും, എല്ലാവര്‍ക്കും മോചനദ്രവ്യമായി സ്വയം നല്‍കുവാനും ആയി വന്ന, മഹത്വപൂര്‍വകമായ കുരിശിന്‍െറ അടയാളത്താല്‍ മുദ്രിതനായ അവിടുന്നില്‍ നിന്ന് പഠിക്കുക.
| All the contents on this site are copyrighted ©. |