Ati i Shenjtë do të kthehet në Val d’Aosta për pushimet verore. Lajmi u konfirmua
nga Imzot Xhuzepe Anfosi, ipeshkëv i Aostës.
(07.04.2009 RV)Papa Benedikti XVI do të kthehet në Val D’Aosta në muajin korrik
për të kaluar pushimet verore në Le Kombë, në bashkinë e Introdit. Lajmi u konfirmua
zyrtarisht sot paradite me një notë të ipeshkvit të Aostës, Imzot Xhuzepe Anfosi,
në të cilën ai i shprehu Atit të Shenjtë gëzimin dhe mirënjohjen e dioçezës së Aostës
dhe të gjithë Luginës së Aostës për këtë gjest miqësie dhe afërsie nga ana e Papës
si edhe i garantoi atij praninë në lutjet e meshtarëve dhe të besimtarëve”. Më përpara
ipeshkvi kishte informuar edhe presidentin e Krahinës, Augusto Rolandin. Për Benediktin
XVI ky do të jetë viti i tretë që kalon pushimet në këtë zonë. Në të njëjtën bashki,
në Le Kombë, pra, ka qenë për pushime edhe paraardhësi i Benediktit XVI, Papa Gjon
Pali II. Për bashkësinë e Val d’Aostës prania e papës këtë vit merr një domethënie
të veçantë, duke qenë se përputhet edhe me Vitin Anselmian, nëntëqindvjetorin e vdekjes
së Shën Anselmit, ipeshkëv dhe filozof, lindur në Aostë në 1033. Këtij shenjti Krahina,
dioçeza, Universiteti i Val d’Aostës si edhe Akademia e Shën Anselmit, i kanë kushtuar
një sërë programesh të pasur në ngjarje kulturore.