8-га красавіка кардынал Казімір Свёнтэк адзначае 70-ю гадавіну сьвятарскага служэньня
8 красавіка 2009 г. старэйшы іерарх Каталіцкага Касцёла ў Беларусі, Апостальскі адміністратар
Пінскай дыяцэзіі, Мінска-Магілёўскі арцыбіскуп на пенсіі, кардынал Казімір Свёнтэк
адзначае 70-ю гадавіну свайго святарскага служэння. З нагоды юбілею свайго святарства
8 красавіка гг. у 11.00 у пінскай катэдры кардынал будзе цэлебраваць урачыстую святую
Імшу з удзелам усіх біскупаў Беларусі і шматлікіх святароў. 26 красавіка кардынал
Казімір узначаліць урачыстую цэлебрацыю святой Імшы ў мінскім архікатэдральным касцёле
ў 11.30 і 13.00. Казімір Свёнтэк скончыў Вышэйшую духоўнаю семінарыю ў Пінску
і 8 красавіка 1939 г. у тамтэйшай катэдры прыняў святарскае пасвячэнне. Пазней працаваў
у в. Пружаны (Брэсцкая вобл.). У выніку пераследу рэлігіі прайшоў праз арышт і
асуджэнне на смерць, два месяцы знаходзіўся ў камеры смертнікаў. На шчасце, прысуд
не быў выкананы, бо ў 1941 г. распачалася вайна. Аднак у 1944 г. малады святар зноў
быў арыштаваны і асуджаны на 10 гадоў лагераў, дзе цяжка працаваў спачатку ў Сібіры,
а потым за Палярным кругам у Інце каля Варкуты. У 1945 г. ксёндз Казімір Свёнтэк
вярнуўся ў Пінск. Дзякуючы яго самаадданай і ахвярнай працы была адбудавана пінская
катэдра. У 1991 г. кс. Казімір Свёнтэк быў прызначаны першым Мітрапалітам новастворанай
Мінска-Магілёўскай Мітраполіі і Апостальскім адміністратарам Пінскай дыяцэзіі. У 1994
г. Святы Айцец Ян Павел ІІ узвысіў яго да кардынальскай годнасці. 11 лютага 1999
г. кардынал Казімір Свёнтэк быў абраны першым старшынёй Канферэнцыі Каталіцкіх Біскупаў
у Беларусі. 27 верасня 2004 г. Святы Айцец Ян Павел ІІ уручыў кардынару Казіміру
Свёнтку, арцыбіскупу Мітрапаліту Мінска-Магілёўскаму, спецыяльную ўзнагароду «Fidei
testis» (Сведка веры), прысуджаную Інстытутам Паўла VI. 23 верасня 2006 г. Прэзiдэнт
Французскай Рэспублiкi Жак Шырак надаў кардыналу Казiмiру Свёнтку званне Камандора
нацыянальнага ордэна Ганаровага легiёна (адна з дзвюх найвышэйшых узнагародаў Францыi).
Як падкрэслiла Пасольства Францыi ў Рэспублiцы Беларусь, узнагарода гэта была прысуджана
чалавеку, якi ў вачах французскiх грамадзян увасабляе сабою гiсторыю беларускага народа
апошнiх сямiдзесяцi гадоў. Цяпер кардынал Казімір Свёнтэк нясе пастырскае
служэнне ў Пінскай дыяцэзіі, Апостальскім адміністратарам якой ён з’яўляецца.
У кастрычніку гэтага года кардынал Казімір адзначыць 95-ю гадавіну з дня свайго нараджэння.