Mesazh i kardinalit Toran drejtuar budistëve për festën e Vesakh
(03.04.2009 RV)Të zgjidhet varfëria e brendshme, shpirtërore, që e pastron
njeriun nga egoizmi, e të luftohet ajo e jashtme, që e fyen dinjitetin njerëzor. Është
sfida në të cilën impenjohen katolikët, sipas mësimeve të Papës, sfidë që përkon me
dëshminë e shkëputjes nga pasuritë, ofruar nga budizmi. Kështu shkruan kardinali Zhan-Lui
Toran, kryetar i Këshillit Papnor për dialogun ndërfetar, në mesazhin tradicional
drejtuar ndjekësve të budizmit me rastin e festës së tyre të afërme të Vesakh. Ky
kremtim i përvitshëm – vijon kardinali Toran – u krijon katolikëve mundësinë për të
shkëmbyer urime me miqtë e të afërmit e budistëve e për të forcuar kështu, lidhjet
aktuale të miqësisë. Janë lidhje të cilat dëshmojnë gjithnjë më qartë – nënvizon kardinali
Zhan-Lui Toran- se ne, së bashku, duke u qëndruar besnikë traditave përkatëse shpirtërore,
jemi në gjendje jo vetëm të kontribuojmë për mirëqenien e bashkësive tona, por edhe
të mbarë bashkësisë njerëzore. Posaçërisht – vijon mesazhi – kur është fjala për
luftën kundër atij tipi të varfërisë, bijë e konsumizmit, që i pengon njerëzit e familjet
të jetojnë me dinjittet, sepse fyen drejtësinë e barazinë dhe kërcënon bashkëjetesën
paqësore.