Papa ipeshkvijve argjentinas: shpallja dhe dëshmia e Ungjillit, shërbimi i parë i
të krishterëve për botën
(02.04.2009 RV)Papa Benedikti XVI
u takua sot me një grup prelatësh të Konferencës ipeshkvnore argjentinase, në vizitë
“ad Limina” në Vatikan. “Shpallja e dëshmia e Ungjillit – u tha atyre Ati i Shenjtë
– janë shërbimi i parë që të krishterët mund t’i bëjnë çdo njeriu dhe krejt racës
njerëzore”. Ungjillëzimi, shpjegoi Papa, bëhet para së gjithash duke dëshmuar thjesht
e drejtpërdrejt Zotin, që na është zbuluar në Jezu Krishtin, në Shpirtin e Shenjtë.
Është dëshmia se përmes Birit të tij, e ka dashur aq shumë botën. Prandaj, ungjillëzimi
nuk është vetëm transmetimi apo mësimi i doktrinës, por shpallja e Krishtit, e misterit
të Tij e të dashurisë së Tij. Ipeshkvijve, Papa u kujtoi se e vërteta e Ungjillit
gjithsesi nuk imponohet, por ndërthuret me kërkimin e apasionuar të së vërtetës, të
së bukurës e të së mirës, që karakterizon njeriun. Çdo aktivitet ungjillëzues – tha
Benedikti XVI – lind nga një dashuri e trifishtë, për Fjalën e Zotit, për Kishën e
për botën. Detyra e parë e Kishës është pra të ushqehet me Fjalën e Zotit. Papa theksoi
se “forma e parë e ungjillëzimit është dëshmia e jetës”. Sot më shumë se kurrë, përfundoi
Ati i Shenjtë, ka nevojë për meshtarë, rregulltarë e laikë, që t’ua bëjnë tërheqës
Krishtin njerëzve të kohës sonë me dëshminë e qartë të një jete koherente e shembullore.