Benedikti XVI në audiencën e përgjithshme: Kisha, përkrah popujve afrikanë, për një
ardhmëri me drejtësi e paqe. Papa lutet për lumnimin e Gjon Palit II.
(01.04.2009 RV)Për të ndërtuar
realisht një ardhmëri me pajtim e paqe të qëndrueshme për të gjithë, popujt afrikanë
duhet ta mbështesin shpresën e tyre mbi Fjalën e Zotit: kjo është porosia e Benediktit
XVI në audiencën e sotme të përgjithshme, mbajtur në Sheshin e Shën Pjetrit, përballë
më se 20 mijë besimtarëve, pavarësisht nga shiu që, me pak ndërprerje, vijoi gjatë
gjithë paradites. Papa rikujtoi çastet më kulmore të shtegtimit të tij të fundit apostolik
në Kamerun e në Angolë. Duke përshëndetur shtegtarët polakë, Benedikti XVI nënvizoi
trashëgiminë shpirtërore të Papës Vojtila, në prag të katërvjetorit të vdekjes. E,
në përfundim të audiencës, takimi prekës me rregulltaret misionare italiane, rrëmbyer
në Kenia e mbajtur peng për më se tre muaj. “Një vizitë për t’i rrokur simbolikisht
mbarë popujt afrikanë: kështu e quajti Benedikti XVI shtegtimin e tij të 11-të apostolik
ndërkombëtar. Duke rikujtuar etapën kameruneze të vizitës baritore, Papa vuri theksin
tek rëndësia që ka Instrumentum laboris për Sinodin e dytë kushtuar Afrikës. Dokumenti
iu dorëzua Kishës afrikane në përfundim të Meshës së madhe të Jaundesë, në festën
e Shën Jozefit: “Asambleja sinodale do të mbahet në Romë, por ajo, në një
farë mënyre, tashmë ka filluar në zemër të Kontinentit afrikan, në zemër të familjes
së krishterë që atje jeton, vuan e shpreson. Prandaj m’u duk fatlum përkimi i publikimit
të “Instrumentum laboris” me festën e Shën Jozefit, model feje e shprese, ashtu si
Patriarku i parë, Abrahami”. Besimi në Zotin – vijoi Ati i Shenjtë – është
garanci shprese për Afrikën e për mbarë botën, garanci për një ardhmëri me pajtim,
drejtësi e paqe. E më pas Papa shtoi: “Në stinën aktuale, gjatë së cilës Afrika po
impenjohet për të forcuar pavarësinë politike dhe identitetin kombëtar në një kontekst
tashmë të globalizuar, Kisha i shoqëron afrikanët, duke u kujtuar mesazhin e madh
të Koncilit II të Vatikanit: “Mes konfliktesh, për fat të keq ende të shumta
e dramatike, që vijojnë të trondisin zona të ndryshme të këtij Kontinenti, Kisha
e di se duhet të jetë shenjë e mjet i unitetit e i pajtimit, që mbarë Afrika të mund
të ndërtojë, e bashkuar, një ardhmëri me drejtësi, solidaritet e paqe, duke vënë
kështu në jetë mësimet e Koncilit II të Vatikanit”. Papa kujtoi, në vijim,
takimet e tij me ipeshkvijtë e Kamerunit si dhe problemet e mprehta, si urgjenca e
ungjillëzimit, formimi i seminaristëve, kujdesi baritor për familjen, mbrojtja e të
varfërve e kundërshtimi i sekteve, për të cilat u fol gjatë këtyne takimeve. Në nunciaturën
e Jaundesë – kujtoi Benedikti XVI – u mbajt takimi me përfaqësuesit e bashkësisë myslimane.
Gjatë këtij takimi u ripohua rëndësia e dialogut ndërfetar dhe e bashkëpunimit ndërmjet
të krishterëve e myslimanëve, për ta ndihmuar botën t’ia hapë zemrën Zotit. Më
pas, duke u rikthyer simbolikisht në Kamerun, kujtoi një nga çastet më prekëse të
shtegtimit të tij apostolik në Afrikë, vizitën në Qendrën Kardinal Lëzhè të Jaundesë
për njerëz të gjymtuar e të sëmurë. Këtu – pohoi Papa – shihet qartë se si mesazhi
i Krishtit vihet në shërbim të njeriut që vuan, duke ia ringjalliur shpresat, që burojnë
nga feja.Më pas Benedikti XVI vijoi të kujtojë vizitën në Angolë. Ky vend – shpjegoi
– i sapo dalë nga një luftë e gjatë e brendshme, sot punon për pajtimin e për rindërtimin
që – tërhoqi vëmendjen Papa - nuk mund e nuk duhet të realizohen në dëm të të varfërve: “Në
Angolë preket vërtetë me dorë ajo, që paraardhësit e mi të nderuar e kanë përsëritur
disa herë: me luftë humbet gjithçka e gjithçka rilind me paqe! Por për ta ndërtuar
një komb, nevojiten energji të fuqishme morale. E këtu del përsëri në plan të parë
roli i Kishës, që duhet të vijojë veprimtaritë edukative, duke punuar në thellësi
për risimin dhe formimin e ndërgjegjeve”. Benedikti XVI foli edhe për
Meshën e madhe të 21 marsit në Luandë, vend që ka si Pajtor Shën Palin. Edhe një herë
- tha Ati i Shenjtë – përvoja e Apostullit të Popujve na foli për takimin me Krishtin
e Ngjallur, që i shndërron njerëzit e shoqëritë: “Ndryshojnë rrethanat historike
– që duhen përfillur mirë – por Krishti mbetet forca e vërtetë e përtëritjtes rrënjësore
të njeriut e të bashkësive njerëzore. Prandaj të rikthehesh tek Zoti, të shndërrohesh
nga Krishti, do të thotë të ecësh përpara, drejt realizimit të plotë të jetës". Për
të treguar se Kisha është e gatshme t’i mbështesë përpjekjet e Angolës në rindërtimin
e vendit - vijoi Papa – u organizuan dy takime të posaçme, me të rinjtë e me gratë.
Për fat të keq, gjatë veprimtarisë së parë ndodhi ngjarja e trishtuar e vdekjes së
dy vajzave, që humbën jetën në hyrje të stadiumit, të shtypura nga turma: “Afrika
është kontinent krejt i ri, por megjithatë shumë prej bijve të saj, fëmijë e adoleshentë,
u janë hapur plagë të rënda, që vetëm Jezu Krishti, i Kryqëzuar e i Ngjallur, mund
t’i shërojë, duke ndikuar në zemrën e tyre, me Shpirtin e tij, forcën që të duan e
të impenjohen për drejtësi e paqe”. Në takimin me gratë – shpjegoi Papa
– ripohova se kanë plotësisht të drejtë të marrin pjesë në jetën publike, por pa e
cënuar misionin e tyre kryesor në familje. Pastaj Benedikti XVI i falënderoi
përsëri të gjithë ata që dhanë ndihmesën e tyre të çmuar për suksesin e vizitës së
tij baritore. Kujtoi edhe veprimtarinë bujare të misionarëve, të rregulltarëve e të
vullnetarëve dhe i nxiti besimtarët të luten për popullsitë afrikane, që të mund t’i
përballojnë me guxim sfidat e mëdha shoqërore, ekonomike e shpirtërore të së sotmes. Në
çastin e përshëndetjeve, duke iu drejtuar shtegtarëve polakë, Papa u kujtoi Gjon
Palin II, në katërvjetorin e vdekjes, dhe i uroi që trashëgimia shpirtërore e Bashkatdhetarit
të tyre të Madh t’i frymëzojë në jetën personale, familjare, shoqërore e kombëtare.
Së bashku me ju – shtoi Benedikti XVI – i lutem Zotit për dhuratën e lumnimit të tij. Çast
prekës ishte edhe ai i fundit të audiencës, kur Ati i Shenjtë u takua me motër Marinë
Tereza Oliviero e motër Katerinën Gjiraudo, misinaret e mbajtura peng në Somali për
102 ditë. Rregulltaret e Lëvizjes kundruese misionare Atë Sharl de Fuko të Kuneos,
iu paraqiten Atit të Shenjtë nga kardinali Severino Poleto, kryeipeshkëv i Torinos.