Papa të rinjve të Shërbimit civil: “të jeni gati edhe të vuani për të mirën e drejtësinë”.
(28.03.2009 RV)“Të jeni persona
në shërbim të të tjerëve, të gatshëm edhe të vuani për të mirën e drejtësinë”: kështu
u foli Papa Benedikti XVI të rinjve të Shërbimit italian civil, të cilët i priti dje
paradite në audiencë në Vatikan. Ishin të pranishëm rreth 7 mijë vullnetarë. Ati
i Shenjtë shprehu vlerësimin e tij për punën e të rinjve, e cila është mision në shërbim
të paqes, u tha. Fatkeqësisht, lufta e dhuna s’ka fund kurrë dhe arritja e paqes është
gjithnjë e më e vështirë. Takimi me vullnetarët e Shërbimit civil u kthye në rast
për të denoncuar garën e armatimeve, pasi nuk është ajo rruga e sigurtë për të ruajtur
paqen, por është një nga plagët më të rënda të njerëzimit, që dëmton në mënyrë të
patolerueshme të varfërit, theksoi Benedikti XVI. Është e nevojshme, shtoi Papa, të
fillohet nga “reforma e shpirtrave”: “Sot si atëherë, kthimi i vërtetë i zemrave
përfaqëson rrugën e drejtë e të vetme drejt paqes, për secilin prej nesh e për krejt
njerëzimin. Është rruga që na tregon Jezusi: Ai – që është Mbreti i gjithësisë – nuk
erdhi për ta sjellë paqen në botë me ushtri, por përmes refuzimit të dhunës. Ia thotë
qartë Pjetrit në kopshtin e Ullinjve: “Ktheje shpatën në vend të vet, sepse të gjitha
ata që kapin shpatën, prej shpatës edhe do të vdesin” (Mt 26,52) Kjo është
rruga që kanë ndjekur e ndjekin jo vetëm dishepujt e Krishtit – vazhdoi Papa – por
shumë njerëz vullnetmirë, dëshmitarë të guximshëm të forcës që ka mospërdorimi i dhunës.
E gjithnjë, duke pasur parasysh Koncilin II të Vatikanit, theksoi: “Nuk mund
të mos lavdërojmë ata që, duke hequr dorë nga dhuna në kërkimin e të drejtave të tyre,
përdorin mjetet e mbrojtjes së personave të vobektë, me kusht që kjo të bëhet pa paragjykuar
të drejtat e detyrat e të tjerëve e të bashkësisë”. Në këtë kategori veprimtarësh
të paqes hyni edhe ju, të dashur miq të rinj. Qofshi pra, gjithmonë e gjithkund mjete
paqeje, duke hedhur poshtë me vendosmëri egoizmin dhe padrejtësinë, indiferencën dhe
urrejtjen, për të ndërtuar e përhapur me durim e këmbëngulje drejtësinë, barazinë,
lirinë, pajtimin, mikpritjen, faljen në çdo bashkësi”. Të rinjtë e Shërbimit
Civil, në një vend si Italia, ku nuk ekziston më shërbimi i detyruar ushtarak, impenjohen
me Karitasin dhe struktura të tjera sociale, për zgjidhjen e problemeve të njerëzve
që kërkojnë solidaritet.