Сёньня ў Магілёве распачынаецца V фэстываль музыкі Ёгана Себасьцьяна Баха. У межах
сёлетняга фэстывалю, які арганізуе Магілёўская гарадзкая капэла, адбудуцца тры канцэрты.
Увечары ў касьцёле сьвятога Станіслава музычны форум адкрые канцэрт арганнай музыкі.
У выкананьні салісткі канцэртнай залі Сафійскага сабору ў Полацку Ксеніі Пагарэлай
прагучаць харальныя прэлюдыі, у тым ліку знакамітая Таката й фуга рэ-мінор. Наступны
канцэрт адбудзецца 27 сакавіка ў Мастацкім музэі імя Паўла Масьленікава. Новую праграму
з твораў Ёгана Себасьцьяна Баха прэзэнтуе гарадзкая капэла. Магілёўцы пачуюць трэцюю
сюіту для аркестру, першы Брандэнбурскі канцэрт і кантату для хору, салістаў ды аркестру
“Магніфікат”. Завершыцца фэстываль 31 сакавіка на сцэне Драматычнага тэатру канцэртам
Дзяржаўнага камэрнага аркестру пад кіраўніцтвам Пятра Вандзілоўскага. У праграме –
трэці й чацьверты Брандэнбурскія канцэрты, другая сюіта для аркестру, а таксама канцэрт
для дзьвюх скрыпак і аркестру рэ-мінор. Арганізатары фэстывалю імкнуцца падкрэсьліць
разнастайнасьць твораў выбітнага кампазытара. У гэтыя дні ў Магілёве будзе гучаць
арганная, аркестравая ды вакальна-інструмэнтальная музыка Баха.