Një milion vetë në Meshën e Luandës. Benedikti XVI: bota të kujdeset për Afrikën e
etur për paqe e drejtësi. Dhimbje për vdekjen e dy vajzave.
(22.03.2009 RV)Shtegtimi i Benediktit
XVI arriti sot kulmin me Meshën Shenjte, bashkëkremtuar me ipeshkvijtë e Imbizës (organizëm
që përfshin prelatët e Afrikës Jugore) në Sheshin e Çimangolës në Luandë. Ishte kremtimi
liturgjik i së Dielës së IV të Krezhmëve. Në fillim të Meshës, Ati i Shenjtë shprehu
dhimjen e thellë për vdekjen e dy vajzave, gjatë shtytjes së turmës për të hyrë në
stadiumin e kryeqytetit, para se të fillonte takimi i djeshëm me të rinjtë. Papa e
ofroi Meshën edhe për dy vajzat, duke ia besuar Jezusit, që t’i pranojë në mbretërinë
e tij. U shprehu solidaritetin dhe afërsinë edhe familjarëve e miqve të tyre dhe u
lut për të plagosurit, rreth dyzet vetë, duke u uruar shërim të shpejtë. Ua besojmë
– përfundoi – planeve të pashqyrtyeshme të Zotit. E sot paradite kardinali Tarçizio
Bertone, sekretar i Shtetit të Vatikanit, shkoi në spital, për t’i përshëndetur të
plagosurit. Për Meshën e sotme, të ndjekim shërbimin e të dërguarit të Radio Vatikanit,
Davide Dionisi, nga Sheshi i Çimangolës:
“Kur fjala e Zotit lihet
pas dore e Ligji i Tij vihet në lojë, përbuzet, tallet, rezultati mund të jetë vetëm
shkatërrimi e padrejtësia. Në Sheshin e pafundmë të Çimangolës, gjatë Meshës me Ipeshkvijtë
e Imbisës, Shoqatë Ndër-Zonale e Ipeshkvijve të Afrikës Australe, Papa u rikthye tek
tmerret e luftës, duke theksuar se frytet mizore të rivalitetit ndërmjet fiseve dhe
etnive e lakmia, që prish zemrën e njeriut, janë përvoja tepër familjare për Afrikën.
Një lakmi – nënvizoi Benedikti XVI - që i katandis të varfërit në skllevër e i lë
breznitë e ardhshme pa burimet materiale, që nevojiten për krijimin e një shoqërie
më solidare e më të dretë – shoqëri me vërtetë afrikane, në përkim me gjeninë e me
vlerat e Kontinentit. Rreth një milion angolezë, ardhur nga të katër anët
e vendit, e pritën Papën, duke marrë pjesë me gëzim në këtë të dielë Krezhmësh, që
u kremtua si ditë e lutjes dhe e flijimit për pajtimin kombëtar. Turmës pa fund të
besimtarëve të pranishëm dhe prelatëve të Konferencës ipeshkvnore të Angolës e Sao
Tomesë, Botsvanës, Jugut të Afrikës e Svacilandit, Lesotos, Mozambikut, Namibisë e
Zimbabves, Papa iu drejtua me fjalët: “Ju e dini, mbi bazën e një përvoje
të hidhur se, në krahasim me furinë shkatrrimtare të së keqes, puna për rindërtim
është e ngadalshme dhe e mundimshme. Kërkon kohë, djersë, këmbëngulje (…) Kujdesuni
që famullitë tuaja të bëhen bashkësi, ku drita e vërtetësia e Hyjit dhe pushteti i
dashurisë pajtuese të Krishtit jo vetëm të kremtohen, por edhe të gjejnë shprehjen
e vet në vepra konkrete të dashurisë së krishterë. E mos kini frikë! Edhe pse kjo
do të thotë të jesh shenjë kundërshtie përballë sjelljeve të vrazhda e mendësisë,
që i shikon të tjerët më shumë si mjete, që duhen përdorur për interesa vetjake, se
sa si vëllezër e motra që duhen dashur, respektuar e ndihmuar gjatë ecjes në rrugën
e lirisë, të jetës e të shpresës”. Pas përqafimit të djeshëm, Papa u
bëri përsëri thirrje të rinjve angolezë të zgjedhin pa kurrfarë frike, rrugën e Krishtit: “Filloni
që sot ta thelloni miqësinë tuaj me Jezusin, që është “rruga, e vërteta, jeta” (Gjn.
14,6); miqësi që ushqehet me lutje të përvuajtur e këmbëngulëse. Kërkoni
vullnetin e Tij mbi ju, duke e dëgjuar ditë për ditë Fjalën e Zotit e duke i modeluar
jetën e marrëdhëniet tuaja, në përkim me ligjin e tij. Kështu do të bëheni profetë
të urtë e bujarë të dashurisë shëlbuese të Hyjit; do të bëheni ungjillëzues të shokëve
tuaj, duke u prirë me shembullin tuaj personal, që ta vlerësojnë bukurinë e vërtetësinë
e Ungjillit, drejt shpresës për ardhmërinë e formuar nga vlerat e Mbretërisë së Hyjit.
Kisha ka nevojë për dëshminë tuaj! Mos kini frikë t’i përgjigjeni bujarisht thirrjes
së Hyjit për t’i shërbyer si meshtarë, rregulltarë e rregulltare, por edhe si prindër
të krishterë ose në format e shumta që propozon Kisha”.