Gjoni lindi në vitin 1330 në Napomuk. Studimet filozofike e teologjike i kreu në Pragë
e u shugurua meshtar nga kryeipeshkvi i qytetit. Menjëherë pas shugurimit, nisi me
zell aq të madh predikimin e Ungjillit, sa Mbreti Vençeslao e emëroi predikatar të
oborrit. Nuk vonoi shumë e kryeipeshkvi, për ta vlerësuar punën e tij, deshi ta zgjidhte
kanonik të katedrales, ndërsa perandori i propozoi selinë ipeshkvnore të Laitmeticit.
Kanoniku, i trembur nga gjithë këto nderime, që nuk i pëlqenin fare, arriti ta bindë
sovranin të hiqte dorë nga propozimi. Kur e njohu bashkëshortja e mbretit, Gjovana
e Bavarisë, grua tejet e përshpirtshme, e zgjodhi si rrëfyes e drejtues të shpirtit.
Mbretëresha e mirë kalonte orë e orë në adhurim para të Shenjtnueshimit Sakrament,
i largohej edhe hijes së mëkatit e ishte shembull virtyti për të gjithë. Por mbreti,
i korruptuar, dyshonte se Gjovana nuk i qëndronte besnike, prandaj e trazonte shpesh,
duke dashur ta detyrojë për të pohuar faje, të cilat i kishte krijuar vetë mendja
e tij e sëmurë. Me që të gjitha përpjekjet përfunduan pa pafryt, duke mos qenë i bindur
për pafajsinë e së shoqes, vendosi ta pyesë rrëfyesin e saj e ta detyrojë t’ia tregojë,
me dashje apo pa dashje, rrëfimet e mbretëreshës. E thirri, prandaj, Gjonin, dhe
u mundua ta bënte për vete me mirësjellje e premtime. Shenjti u tmerrua nga propozimi
i mbretit e iu përgjigj me guxim se në këtë rast nuk mund e nuk do t’i bindej. Pasi
u kërcënua me burgim e edhe më keq akoma, u thirr përsëri e iu kërkua të nxirrte të
fshehtën e sakramentit. Po Gjoni nuk u përkul as këtë herë, e as herën tjetër, kur
mbreti e thirri për drekë. I tërbuar, mbreti urdhëroi të flakej në lumin Moldava,
që kalon nëpër Pragë. Urdhëri u zbatua natën, nga frika e një kryengritjeje të mundshme
popullore. Gjoni u çua tek një nga urat e qytetit e, ndërmjet shtyllës së gjashtë
e të shtatë, ku një kryq u tregon edhe sot e kësaj dite kalimtarëve ku u krye krimi,
u hodh në vorbullat e lumit. Ishte viti 1383. Të nesërmën lumi nxori në breg një
kufomë, të rrethuar prej një drite misterioze. Ishte trupi i Gjon Nepomuçenit. I gjithë
qyteti u ngrit në këmbë, sapo mori vesh kush e kishte kryer këtë krim të shëmtuar
e pse. Trupi u mbart me proçesion në Kishën e afërme të Shenjtes Krygjë, ndërsa njerëzit
duke qarë, i puthnin këmbët e i luteshin të ndërmjetësonte për ta! Është një nga
martirët e rrallë të rrëfimit. Na kujton një tjetër martir, që vdiq për të mos e nxjerrë
sekretin e sakramentit: martirin shqiptar të rrëfimit, një nga 40-tët që pritet të
lumnohen, françeskanin Atë Karl Serreqi.