Benedikti XVI i fton politikanët e diplomatët ta shndërrojnë Kontinentin, duke u bazuar
mbi parimet e domosdoshme të çdo demokracie moderne
(20.03.2009 RV) Në përfundim të
ceremonisë së mirëseardhjes, Ati i Shenjtë u largua nga aeroporti në drejtim të Nunciaturës
Apostolike të Luandës, ku kaloi drekën. Më pas u nis drejt Pallatit Presidencial
për një vizitë mirësjelljeje Presidentit të Republikës së Angolës, Dos Santos, me
të cilin zhvilloi një bisedë private, në praninë e sekretarit të Shtetit dhe të një
bashkëpunëtori. Në përfundim të takimit, Papa përshëndeti bashkëshorten dhe familjarët
e presidentit, u bënë fotot zyrtare dhe u shkëmbyen dhuratat. Ndërkaq grupi që
shoqëron Papën kaloi në sallonin e nderit, ku ishin mbledhur përfaqësuesit më të lartë
të botës politike e civile, anëtarët e Trupit Diplomatik dhe ipeshkvijtë e Angolës.
Pas bisedimit, presidenti e shoqëroi edhe Benediktin XVI në sallon, ku u mbajt një
nga takimet më të rëndësishme të Papës, ai me autoritetet politike e civile si dhe
me Trupin Diplomatik. Takimi filloi me fjalimin e presidentit, pas të cilit Shenjtëria
e Tij iu drejtua botës politike angoleze dhe bashkësisë ndërkombëtare, duke i ftuar
udhëheqësit të përpiqen me të gjitha forcat për progresin e vendit e të Kontinentit.
Pas njëzet e shtatë vjet lufte civile, që e shkatërroi Angolën – kujtoi Papa - paqja
ka nisur të lëshojë rrënjë, duke sjellë me vete frytet e stabilitetit e të lirisë.
Përpjekjet e dukshme të qeverisë për rregullimin e infrastrukturave dhe riorganizimin
e institucioneve, pa të cilat shoqëria nuk mund të zhvillohet e as të arrijë mirëqenien
e dëshiruar, bënë që në zemrat e banorëve të lulëzojnë përsëri shpresat. E nuk mungojnë,
në të katër anët e vendit, shembujt e mësuesve, të punonjësve të shëndetësisë e të
nëpunësve të shtetit që, ndonëse paguhen fare pak, punojnë me përkushtim në shërbim
të shoqërisë. Shtohet gjithnjë më shumë edhe numri i njerëzve, që u shërbejnë vullnetarisht
më nevojtarëve: “Angola e di se për Afrikën ka ardhur koha e shpresës. Ju
mund ta shndërroni këtë Kontinent, duke e çliruar popullin tuaj nga shuplaka e lakmisë,
e dhunës dhe e çrregullimit, duke i prirë në shtegun që tregojnë parimet e domosdoshme
të çdo demokracie moderne: respekt e promovim i të drejtave të njeriut, qeveri transparente,
magjistraturë e pavarur, komunikim i lirë shoqëror, administratë publike e ndershme,
rrjet shkollash e spitalesh që funksionojnë si duhet, vendosmëri e patundur, e bazuar
në shndërrimin e zemrave, për ta çrrënjosur një herë e mirë korrupsionin”. Papa
theksoi me forcë vlerën e etikës në shërbim të zhvillimit. Nuk është fjala për një
çështje teorie, por për një zë, që buron nga vetë njerëzit e që u drejtohet atyre,
të cilët shërbejnë në politikë, në administratën publike, në agjensitë ndërkombëtare
e në shoqëritë shumëkombëshe, duke i ftuar: qëndroni pranë nesh në mënyrë me të vërtetë
njerëzore, na shoqëroni ne, familjet tona, bashkësitë tona”: “Zhvillimi ekonomik
e shoqëror i Afrikës kërkon që Qeveria kombëtare ta koordinojë veprimtarinë e saj
me nismat zonale e me vendimet ndërkombëtare. Një koordinim i tillë nënkupton që kombet
afrikane të shikohen jo vetëm si zbatuese të planeve e të rrugëzgjidhjeve të planifikuara
nga të tjerët. Afrikanët vetë, duke punuar së bashku për të mirën e bashkësisë, duhet
të jenë protagonistë të zhvillimit të tyre”. E, lidhur me këtë, nuk mungojnë
një sërë nismash, të cilat Papa i kujtoi një nga një, për të theksuar, më pas, se
qëllimi i tyre i përbashkët është të promovojnë transparencën, ndershmërinë praktike
tregtare e qeverisjen e mirë: “Përsa i përket bashkësisë ndërkombëtare në
tërësinë e saj- vijoi Papa – një rëndësi të dorës së
parë merr koordinimi i përpjekjeve për të përballuar problemin e ndryshimeve klimaterike,
përmes realizmit të plotë e të drejtë të impenjimeve në shërbim të zhvillimit, marrë
në Doha si dhe për të vënë në jetë premtimin e bërë nga vendet e zhvilluara që ta
përdorin 0,7% të prodhimit të brendshëm brut si ndihmë zyrtare për zhvillimin”. E kjo ndihmë – theksoi Papa - sot është edhe më e nevojshme, duke pasur parasysh
stuhinë financiare botërore, nga e cila nuk ka shpëtuar as Angola. Së fundi Ati
i Shenjtë u ndalua tek roli, por edhe tek gjendja e vështirë e familjes, që tronditet
rëndë nga varfëria, papunësia, sëmundjet, mërgimi, diskriminimi i grave e i vajzave,
dhuna që ushtrohet mbi ta dhe plagët e rënda të shfrytëzimit seksual e të abortit.
Duke shprehur shqetësimin e tij për politikat e atyre që, me mirazhin e përparimit,
e rrezikojnë seriozisht familjen e edhe vetë shoqërinë, Ati i Shenjtë riktheksoi me
forcë: “Familja është themeli mbi të cilin ngrihet ndërtesa shoqërore”. Duke
kujtuar këto plagë që presin të shërohen, Papa nënvizoi rëndësinë e impenjimit të
Kishës, që është gjithnjë përkrah njerëzve më të varfër të këtij Kontinenti. Ati i
Shenjtë i siguroi të pranishmit se Kisha, përmes nismave të shumta dioqezane, veprave
të panumërta edukative, shëndetësore e shoqërore të urdhrave të ndryshme rregulltare,
programeve të zhvillimit të Karitasit dhe të organizatave të tjera, do të bëjë gjithçka
është e mundur për t’i ndihmuar familjet, duke përfshirë edhe ato që vuajnë për shkak
të Sidës – e për të siguruar barazinë ndërmjet burrit e gruas.