"Në vuajtje keni pranë Krishtin". Këto ishin fjalët e Atit të Shenjtë për të sëmurët
e Qendrës Kardinal Leger
(19.03.2009 RV)Ky kthim i syve
nga Jezu Krishti, ky besim i plotë në të, lëshimi në dorën e Hyjit e ndjekja e planit
të tij, ishin po sot pasdite në qendër të takimit të Papës Benedikti XVI me botën
e të sëmurëve në Qendrën “Kardinal Leger” në Jaundé. Përveç autoriteteve kishtare,
ishin të pranishme edhe autoritete civile, ndër to, Ministri i Shëndetësisë i Kamerunit.
Qendra është e specializuar për trajtimin dhe rehabilitimin e personave me të meta
fizike e trauma. Themeluar nga kardinali kanadez Leger në vitin 1972, që nga 1978-a
i ka kaluar shtetit, i cili e administron edhe sot: “Ju e dini se nuk jeni
vetëm në vuajtje – u tha Papa të sëmurëve – sepse vetë Krishti është solidar me ata
që vuajnë. Ai u zbulon të sëmurëve vendin që zënë në zemrën e Hyjit e në shoqëri…
Ai u zbulon edhe, me gjeste konkrete, dhembshurinë dhe kujdesin e veçantë ndaj të
gjithë atyre që e kanë zemrën e thyer e trupin e plagosur”. Pak fjalë, e Ati
i Shenjtë numëroi të gjitha sëmundjet kryesore që e bëjnë Afrikën të luftojë me dhimbjen
në këtë moment: “Mendoj për të gjithë të sëmurët, e sidomos këtu në Afrikë,
për viktimat e sëmundjeve si Sida, malarja dhe tuberkulozi. E di mirë se si Kisha
katolike është impenjuar fortësisht në një luftë efikase kundër këtyre shuplakave
të tmerrshme dhe e inkurajoj të vazhdojë me vendosmëri këtë vepër të ngutshme. Ju
që sprovoheni nga sëmundja e vuajtja, familjeve tuaja, dëshiroj t’ju sjell pak ngushëllim,
t’ju rinovoj mbështetjen time e t’ju ftoj t’i drejtoheni Krishtit e Zojës, që Ai na
ka dhënë si Nënë”. Shumë persona, tha Papa, kur gjenden para sëmundjes, e
tyrja ose e të afërmve, tundohen e dyshojnë për praninë e Zotit e për ndihmën e Tij.
Para vuajtjes pa fund, shpjegoi, ndihemi të pafuqishëm e nuk gjejmë fjalët e duhura.
Në këto raste, heshtja është ar. Një gjest i dhimbsur, një vështrim, një buzëqeshje,
mund të bëjnë shumë më tepër se njëmijë fjalë. Papa përmendi shembullin e Simonit
të Cirenës, një afrikan, që pa fjalë, ndihmoi Krishtin të mbante kryqin në rrugën
e Mundimeve. Kur dyshojmë për praninë e Zotit, le të mendojmë për të, tha Benedikti
XVI. Ai nuk e dinte se kishte pranë Hyjin, por e kuptoi vetëm pas ngjalljes së Krishtit: “Kështu
është për secilin prej nesh, vëllezër e motra: në kulmin e dëshpërimit, të revoltës,
Krishti na propozon praninë e Tij të dashur, megjithëse ne e kuptojmë me vështirësi
se na qëndron pranë. Vetëm fitorja përfundimtare e Zotit do të na zbulojë kuptimin
e sprovave tona… Duke parë poshtërsinë që treguan ndaj Jezusit, duke kundruar fytyrën
e tij në Kryq, duke njohur tmerrin e dhimbjes së tij, mund të ravijëzojmë, me anë
të fesë, fytyrën e ndritur të të Ringjallurit që na thotë se vuajtja e sëmundja nuk
do të jenë fjala e fundit në jetën tonë njerëzore”. Papa dha më pas shembullin
e Shën Terezës të Avilës, e cila në shkrimet e saj, shtyn drejt lutjes, drejt imitimit
të shën Jozefit, i cili me bindjen e tij ndaj Zotit na tregon rrugën për shpëtimin
e shpirtit. Ta zgjedhim edhe ne, tha Benedikti XVI, si mësues lutjesh. Ati i Shenjtë
pati fjalë lavdërimi për të gjitha ata që u qëndrojnë afër dhe i ndihmojnë të sëmurët.
E më pas: “Juve, punonjës shkencorë e mjekë, ju takon të vini në zbatim gjithçka
të ligjshme për të lehtësuar dhimbjen; ju takon ju së pari të mbroni jetën njerëzore,
të jeni mbrojtës të jetës që nga zënia deri në fundin e saj të natyrshëm”. E
në fund, Ati i Shenjtë iu drejtua veprimtarëve të Kishës e meshtarëve: “Inkurajoj
meshtarët dhe vizitorët e të sëmurëve të impenjohen me praninë e tyre aktive dhe miqësore
në baritorinë e shëndetit në spitale ose për sigurimin e pranisë kishtare në shtëpi,
për ngushëllimin dhe mbështetjen shpirtërore të të sëmurëve. Sipas premtimit të tij,
Zoti do t’ju japë pagën e duhur dhe do t’ju shpërblejë në qiell”. Nesër, Papa
Benedikti XVI do të largohet nga Kameruni për të shkuar në Angolë, etapa e dytë e
shtegtimit të tij apostolik në Afrikë. Pas ceremonisë së mirëseardhjes në aeroportin
e Luandës, kryeqytetit të Angolës, Ati i Shenjtë do t’i bëjë një vizitë kortezie presidentit
të Republikës, do të takohet me autoritetet civile e me Trupin Diplomatik, si edhe
me ipeshkvijtë e Angolës e të Shao Tomé.