Mbledhje të hollash në këtë kohë Kreshmësh për Tokën Shenjte.
(17.03.2009 RV)Papa dhe Kisha janë
të shqetësuar për fatin e të krishterëve në Tokën Shenjte, ku dhuna i shtyn njerëzit
të ikin. Letër e Kardinalit Leonardo Sandri për mbledhjen e të hollave gjatë Kreshmëve
në ndihmë të Vendeve të Shenjta. “Ajo tokë që qe djepi i Krishtërimit rrezikon
të mbesë pa të krishterë.” Ky alarm u dha nga prefekti i Kongregatës për Kishat Lindore,
Leonardo Sandri në letrën që i ka dërguar, – siç është bërë tashmë traditë për kohë
Kreshmësh, – të gjithë ipeshkvijve për të promovuar solidaritetin e të gjithë të krishterëve
në mbarë botën me vëllezërit e krishterë në Tokë Shenjte, “të cilët – nënvizon kardinal
Sandri – së bashku me banorë të tjerë të shumë zonave të Lindjes së Mesme, ka shumë
kohë që kërkojnë paqë dhe qetësi, të cilat janë ende të kërcënuara.” Këtej buron edhe
“shqetësimi i thellë” i Papës dhe i Kishës përballë “rifillimit të dhunës në Rripin
e Gazës” i cili e shuajti, – shkruan me hidhërim të thellë Kardinali Sandri, – gëzimin
e Krishtlindjes dhe e turbulloi shpresën për të ardhmen. Kjo gjë ndodhi pas mbështetjes
shpirtërore dhe materiale që popullsia e krishterë mori nga shtegtarët numri i të
cilëve gjatë vitit 2008 e kaloi atë të vitit të Jubileut të 2000. Situata e vazhdueshme
e dhunës është një plagë e hapur, denoncon hirësia e tij Sandri në këtë letër, e cila
i shtyn njerëzit të largohen nga Vendet e Shenjta, duke ia hequr pakicës së krishterë
“burimet më të mira për të ardhmen”. Prandaj edhe Imzot Sandri i falenderon në
emër të Papës të gjithë ata që të Premten e Madhe të ardhshme do të japin ndihma për
Tokën Shenjte. Në fund letra e Imzot Sandrit shoqërohet edhe nga një listë e Kongregatës
ku tregohen të gjitha punët e mira e të dobishme që janë bërë me paratë e mbledhura
vitin e kaluar.