Identiteti misionar i meshtarit në Kishë – në qendër të mbledhjes plenare të Kongregatës
për Klerin: intervistë me imzotin Piaçenca
(17.03.2009 RV)“Identiteti misionar
i meshtarit në Kishë” është titulli i asamblesë plenare të Kongregatës për Klerin,
që filloi dje në Vatikan e do të vijojë deri të mërkurën e ardhshme. Folëm për këtë
mbledhje të rëndësishme me imzot Mauro Piaçencën, sekretar i dikasterit:
Përgjigje:
- Identiteti misionar i meshtarit është absolutisht qëndror, si përsa i përket
natyrës së meshtarisë, ashtu edhe për kryerjen e shërbimit e për karakterin misionar
të vetë Kishës. Misioni nuk është e as nuk mund të jetë një element ‘ndihmës’ për
identitetin kishtar e, në të, për identitein meshtarak. Misioni meshtarak varet drejtpërdrejtë
nga misioni i marrë prej Zotit. Si përfundim mund të themi se meshtari duhet të jetë
plotësisht i qartë për mandatin apostolik, që i është besuar, e për përkimin sa më
të plotë me Krishtin meshtar.
Pyetje: - Në ç’këndvështrime do të analizohet
tema e identitetit misionar të meshtarit?
Përgjigje: - Do të shikohet
nga vetë mendimet, që do të shprehin Etërit e mbledhjes plenare, por sigurisht njëra
nga vijat kryesore është ajo e formimit të përhershëm që – siç është e natyrshme -
lidhet ngushtë me formimin fillestar. Është gjithnjë në pritë rreziku i njëjtësimit
të tepruar të formimit me informimin, të studimit me transmetimin e taktikave e metodave,
që mund të jenë të nevojshme në vende ose në çaste të tjera. Formimi natyrisht kërkon
edhe informim, por jo vetëm kaq: rruga më e mirë për t’i formuar meshtarët me frymë
vërtetë misionare, nuk është thjeshtë ajo e kryerjes me sukses të studimeve, por
kryesisht ajo e rritjes së dashurisë për Zotin, për Kishën, për shpirtërat, duke u
interesuar gjithnjë për të tjerët. Shtyllat kryesore të këtij formimi janë: thellimi
jetës shpirtërore personale, lidhja e ngushtë me të mbinatyrshmen e formimi doktrinor.
Duhet të jemi misionar të së vërtetës, të vërtetës së plotë e vetëm të së vërtetës,
e e vërteta nuk është koncept, por është Jezusi! E duhet edhe ta kemi shumë të zhvilluar
përgjegjësinë për ta bërë mirë të mirën e të jemi të formuar për marrëdhëniet ndërmjet
njerëzve, për t’i tërhequr të gjithë në rrugën tonë, që është rruga e Jezusit.