Editorial i Atë Federiko Lombardit: “Përparësitë e udha”.
(15.03.2009 RV)Një letër intime,
e thellë dhe e drejtpërdrejtë, që i preku në zemër ipeshkvijtë. Këtë e vërtetojnë
shumë reagime, plot mirënjohje, nga ana e episkopatit botëror, pas botimit të Letrës
së Papës për heqjen e shkishërimit katër prelatëve të Vëllazërisë së Shën Piut X.
Fjalë të cilat ftojnë për pajtim, që buron nga vetë Ungjilli e ripohojnë themelet
e shpirtit të magjisterit të papnisë së Benediktit XVI. Mbi përmbajtjen e letrës,
të ndjekim reflektimin e drejtorit tonë të përgjithshëm, Atë Federiko Lombardi:
“Letra
e re e Papës drejtuar ipeshkvijve, është një dokument origjinal, me stil të thjeshtë
e personal. Rasti – siç dihet – u krijua nga diskutimet lidhur me heqjen e shkishërimit
katër ipeshkvijve, shuguruar nga imzot Lëfevrë, masë për të cilën flet Papa, duke
shpjeguar qartë natyrën, kufizimet e ndjetin, dmth kërkimin e unitetit, edhe atëherë
kur kjo është e vështirë. Por dokumenti ka një domethënie shumë më të gjërë, sepse
bëhet dëshmi e fuqishme e përparësive dhe e kritereve të Benediktit XVI në shërbimin
e tij të qeverisjes së Kishës. Papa ripohon qëllimet e mëdha parësore të Papnisë
së Tij: udhëheqja e njerëzve drejt Zotit, drejt Zotit, që u zbulua në Bibël e në Krishtin;
bashkimi i të krishterëve dhe ekumenizmi, dialogu ndërmjet atyre që besojnë në Zotin,
dmth dialogu ndërfetar për paqen në botë; përmasa shoqërore e dashurisë së krishterë.
Janë përparësi që njihen mirë që nga fjalimi i parë i Benediktit XVI në Kapelën Sikstine,
përparësi të cilat i vë besnikërisht në jetë çdo ditë me fjalë e me vepra. Por Papa
vë në dukje me forcë edhe cili është kriteri, që udhëheq qeverisjen e tij dhe shpirti,
që e gjallëron. Është Ungjilli, Ligji i ri i Krishtit. Në se ai impenjohet dhe shprehet
për udhën e pajtimit, e cila ndesh shumë kundërshtime, e bën këtë sepse Zoti na ka
thënë se po të ketë “vëllau ndonjë gjë kundër nesh”, duhet ta lëmë dhuratën para elterit
e të shkojmë më parë të pajtohemi me të. Ungjilli duhet marrë seriozisht, pa asnjë
zbutje. Urdhëri i dashurisë është tejet kërkues. Ta falënderojmë Papën, që i dëshmoi
edhe një herë, me shumë fryt, Kishës e botës, se në vend të parë është Zoti e udha
më e mirë për të shkuar tek ai, është Ungjilli i Jezusit”.