Benedikti XVI viziton Kampidolin e fton Romën të jetë solidare për të kapërcyer krizën
e për të favorizuar integrimin.
(09.03.2009 RV)Roma duhet të rikthehet
tek rrënjët e veta civile e kristiane, në se dëshiron t’i paraprijë një humanizmi
të ri, që mbron dinjitetin e njeriut, e ndihmon t’i kapërcejë vështirësitë e sotme
shoqërore-ekonomike dhe t’i kundërvihet varfërisë shpirtërore, që ndjehet fort veçanërisht
në mjediset më të degraduara. Ky është mesazhi që i la Papa Qytetit të Amshuar, në
përfundim të një paraditeje të rëndësishme, gjatë së cilës vizitoi selinë e Komunës
kapitoline. Ati i Shenjtë, që para kryetarit të bashkisë, Gjani Alemano dhe bashkëpunëtoëve
të tij, preku disa tema të mprehta, që nga kriza ekonomike, tek integrimi e tek dhuna
që ushtrohet në qytet, përshëndeti më pas, nga ballkoni mbi Shesh, njerëzit e mbledhur
që në mëngjes heret për ta parë e për ta duartrokitur. Në përfundim të takimit bëri
edhe një vizitë të shkurtër në kuvendin e afërt të Oblateve të Shën Françeskës Romake
në Tor de’ Speki. Pas njëmbëdhjetë vjetësh, një papë ngjit përsëri atë kodrinë,
50 metra mbi nivelin e detit – e cila në shekuj, e sidomos në botën e lashtë, simbolizon
strumbullarin civil, fetar e politik të Romës. Kapitolium, më e vogla e më e rëndësishmja
nga të shtatë kodrat romake, e pa sot Benediktin e XVI duke ecur mbi gjurmët e Palit
VI e të Gjon Palit II, që u ngjitën para tij në Kampidol e, më 1966 dhe më 1998, e
patën marrë fjalën përpara autoriteteve qytetare. Edhe Benedikti XVI, duke nisur
nga ora 11. 30, foli përpara Këshillit komunal, mbledhur në një seancë të jashtëzakonshme
në sallën e Jul Qesarit. Në fjalët e Atit të Shenjtë, inkurajim për mbarështuesit
kapitolinë, u ndje fort edhe dëshira për të bashkëpunuar, në përpjekjen për t’iu
përgjigjur sa më mirë nevojave e shpresave të banorëve, duke i njohur nga afër shqetësimet
e problemet e tyre. Por njëkohësisht Benedikti XVI ripohoi me forcë edhe se Roma ka
nevojë të rikthehet tek vlerat e përhershme të Ungjillit, në se dëshiron të jetë përsëri
fanar i jetës dhe i lirisë, i qytetërimit moral dhe i zhvillimit të qëndrueshëm:
“Në
epokën pas-moderne Roma duhet të rifitojë shpirtin e saj më të thellë, rrënjët e saj
civile e të krishtera, në se dëshiron të bëhet nismëtare e një humanizmi të ri, që
vë në qendër çështjen e njeriut, të njohur në realitetin e tij të plotë. Njeriu,
i shkëputur nga Zoti, do të mbetej pa thirrjen e tij të mbinatyrshme. Krishterimi
është mbartës i një mesazhi të ndritshëm për të vërtetën mbi njeriun e Kisha, së cilës
iu dorëzua ky mesazh, është e vetëdijshme për përgjegjësinë e saj përballë kulturës
bashkëkohore”.
Pak minuta para orës 11. 30, kryetari
i bashkisë së Romës, Gjani Alemano, e priti Papën tek hyrja e Sikstit XVI, ndërsa
turma brohoriste e sytë e 400 gazetarëve të akredituar i qenë drejtuar mysafirit të
madh. Benedikti XVI u kthye disa herë nga njerëzit e mbledhur në sheshin, ku ngrihet
shtatorja e famshme e Mark Aurelit mbi kalë, para se të hynte në Pallatin senatorial.
Pak minuta më pas, telekamerat e inkuadruan mbi ballkonin e vogël të zyrës së kryetarit
të bashkisë, prej nga dukej panorama e mrekullueshme mbi Forin Romak, të ndriçuar
nga dielli. Ceremonia vijoi sipas programit, me përshëndetjen e Papës drejtuar
anëtarëve të këshillit bashkijak dhe funksionarëve të tjerë në Sallën e Sixhadesë,
pasuar nga nënshkrimi i Librit të artë të vizitorëve në Sallën e Flamujve, ku Benediktin
XVI e përshëndeti kryetari i bashkisë kapitoline i cili, duke nënvizuar vlerën historike
të vizitës së Atit të Shenjtë, nguli këmbë posaçërisht tek koncepti i Romës si qytet
i shquar për mikpritjen. E kjo u konfirmua edhe nga vendimi i posaçëm i Komunës, për
të cilin u fol gjatë takimit me Papën:
“Me rastin e kësaj vizite historike,
si shenjë e vogël, por domethënëse, e një përpjekjeje të tillë, Komuna e Romës vendosi
të realizojë një qendër për mikpritjen dhe edukimin e adoleshentëve, posaçërisht të
atyre që janë më të varfër e që kalojnë çaste më të vështira. Në shenjtë nderimi për
Ju, administrata komunale e Romës zgjodhi për këtë nismë emrin tuaj “Qëndra Benedikti
XVI”.(…). Është një ndihmesë e vogël në mbështetje të veprimtarisë edukative për të
cilën administrata komunale dhe Kisha katolike me instituciont e veta të vullnetariatit,
janë të thirrura të japin ndihmesën e tyre, duke i vënë në jetë parimet e ndihmës
e të bashkëpunimit solidar”.
Si falënderoi kryetarin
e bashkisë, Benedikti XVI u përqendrua kryesisht tek ndryshimet shoqërore që ka pësuar
indi urban i kryeqytetit, duke pranuar se ‘kantieri i Romës’ së mijëvjeçarit të
tretë, përballon prej dekadash sfida të pashembullta:
“Roma ka ardhur
duke u populluar me njerëz nga kombe të ndryshme, që u përkasin kulturave dhe traditave
të ndryshme fetare e, si pasojë e kësaj, nganjëherë integrimi është i lodhshëm e i
ndërlikuar. Nga ana e bashkësisë katolike nuk do të mungojë kurrë mbështetja për të
gjetur mënyra gjithnjë më të përshtatshme për mbrojtjen e të drejtave themelore të
njeriut, në frymën e respektimit të ligjshmërisë”.
Një
ligjshmëri, që është vënë në diskutim nga episodet e dhunës të cilat –vërejti Papa
– ndonëse dënohen nga të gjithë, janë shenjë e qartë, që flasin për shqetësime më
të thella:
"Janë shenjë – do të thosha – e një varfërie të vërtetë shpirtërore,
që plagos zemrën e njeriut të kohëve tona. Zhdukja e Zoti dhe e ligjit të tij, si
kusht për realizimin e lumturisë së njeriut, nuk e ka arritur aspak qëllimin; përkundrazi,
e lë njeriun pa sigurinë shpirtërore e, sidomos, pa shpresën e nevojshme për të përballuar
vështirësitë e sfidat e përditshme”.
Prandaj mund
të themi – vijoi Benedikti XVI - se kriza e sotme ekonomike me rrjedhojat e saj,
si puna e pamjaftueshme dhe varfërimi i shumë njerëzve, kërkon një përpjekje të përbashkët
të institucioneve civile me struktuart bamirëse, shumë nga të cilat të drejtuara nga
Kisha. Ndërmjet tyre Papa kujtoi edhe strukturën e re, që po lind në veri të Romës,
kushtuar atij nga Komuna:
“Familjet, rinia mund të shpresojnë
në një ardhmëri më të mirë në atë masë, që individualizmi u krijon hapësirë ndjenjave
të bashkëpunimit vëllazëror ndërmjet të gjitha pjesëve përbërëse të shoqërisë civile
dhe të bashkësisë së krishterë. Uroj që kjo vepër të jetë nxitje për Romën, që të
realizojë indin shoqëror të mikpritjes e të respektit, ku takimi ndërmjet kulturës
e fesë, ndërmjet jetës shoqërore e dëshmisë fetare, të ndihmojë për formimin e bashkësive
vërtetë të lira e të gjallëruara nga ndjenjat e paqes”.
Duartrokitjet
u bënë të stuhishme në çastin kur Papa u drejtoi të pranishmëve fjalët e përshëndetjes
përfundimtare, para se të largohej:
“Të dashur miq, duke u rikthyer
në shtëpitë tuaja, në bashkësitë tuaja e në famullitë tuaja, thojini atyre që do të
takoni se Papa i siguron të gjithë për mirëkuptimin, për afërsinë shpirtërore e për
lutjen e tij. Ju falënderoj për praninë tuaj. Mirupafshim! Javë të gëzuar!”.