(04.03.2009 RV)Vazhdon misioni i Sekretares amerikane të Shtetit, Hilari Klinton
në Lindjen e Mesme. Pas etapës së Jeruzalemit, sot ajo u takua në Ramallah të Çisjordanisë
me kryeministrin e Autoritetit kombëtar palestinez, Salam Fajad dhe me presidentin
Abu Mazen. Ky i fundit kërkoi që SHBA-të të ndërhyjnë për ta detyruar Izraelin të
pezullojë ndërtimin e ngulimeve hebraike në Territoret palestineze. Vetë Klinton kritikoi
shembjen e shtëpive të palestinezëve nga ana e izraelitëve në Jeruzalemin lindor,
pasi ky është një hap kundër procesit të paqes. Ajo konfirmoi mbështetjen amerikane
për qeverinë e Abu Mazenit dhe i kërkoi organizatës integraliste Hamas të njohë Izraelin,
nëse dëshiron të ulet në tryezën e bisedimeve për paqen.