(26.02.2009 RV)Në Bangladesh trupat ushtarake që dje nisën revoltën, sot lëshuan
armët si edhe liruan të gjitha pengjet që kishin marrë gjatë rebelimit të tyre kundër
eprorëve. Ushtarakët u dorëzuan pasi nga ana e qeverisë iu garantua amnistia si edhe
iu premtua për shqyrtimin e përmirësimit të kushteve të jetesës. Lajmi u dha nga një
zëdhënës i qeverisë së Bangladeshit. “Të gjithë ushtarët dorëzuan armët dhe u kthyen
nëpër kazermat e tyre. Ministri i brendshëm si edhe ai financave gjenden aty. Po ashtu
edhe të gjitha pengjet u liruan.” Kështu deklaroi për mjetet e informacionit zëdhënësi
i kryeministrit Abul Kalam Azad.
Opozita pakistanase mbështet ish-kryeministrin
Navaz Sharif Me mijëra demonstrues, mbështetës të ish-kryeministrit të Pakistanit
Navaz Sharif protestuan sot në Lahorë, pas vendimit të gjykatës së lartë që përjashton
atë si edhe vëllain e tij nga ushtrimi i detyrave përkatëse në postet që mbajnë. Kështu
vendi aziatik, me bombë atomike, mik i SHBA-ës këto ditë ka qenë në qendër të një
stuhie që ka të bëjë me pushtetin politik. Gjykata e lartë po ashtu me një vendim
të sajin rrëzoi edhe një nga qeveritë vendore që drejtohej nga lideri i opozitës Sharif,
kundërshtari kryesor i presidentit të tashëm Azif Ali Zardari. Kjo qe edhe arsyeja
e demonstratës së sotme në Lahorë, qytet kryesor i provincës së Panxhabit e njëkohësisht
qendër e opozitës së Sharifit. “Kur policia nuk u lejon përfaqësuesve të popullit
të hyjnë në asamblenë ku janë zgjedhur, atëherë çfarë demokracie është kjo?”-tha zëdhënësi
i opozitës Ali Azgar Manda.