Ствараецца аргкамітэт па ўзвядзеньні ў Менску помніка Яну Паўлу ІІ
Да канца сакавіка 2009 года плануецца стварэнне аргкамітэта па збудаванні ў Мінску
помніка Яну Паўлу II, паведаміў БелаПАН ініцыятар ушанавання памяці пантыфіка, настаяцель
мінскага Чырвонага касцёла (касцёла святых Сымона і Алены) ксёндз‑магістр Уладзіслаў
Завальнюк. Паводле яго слоў, збудаванне помніка «адпавядае волі пантыфіка
наведаць Беларусь». «Бо святы айцец вельмі хацеў гэта зрабіць, не раз прымаў дзяцей
і дарослых — беларускіх пілігрымаў, у тым ліку вядомых дзеячаў навукі і культуры.
І кіраўнік дзяржавы Аляксандр Лукашэнка выказаў шкадаванне, што Ян Павел II не змог
пабываць у Беларусі», — сказаў У.Завальнюк. Паводле яго слоў, летась пры падтрымцы
мітрапаліта Мінска‑Магілёўскага арцыбіскупа Тадэвуша Кандрусевіча ён пісьмова звярнуўся
ў Адміністрацыю прэзідэнта з прапановай збудаваць помнік святому айцу на месцы ўстаноўкі
закладнога каменя, асвечанага 22 чэрвеня 2008 года дзяржсакратаром папы рымскага кардыналам
Тарчызіо Бертонэ падчас яго афіцыйнага візіту ў Беларусь. «Наша прапанова была
падтрыманая ў Адміністрацыі прэзідэнта», — зазначыў У.Завальнюк. Паводле яго слоў,
велічны помнік Яну Паўлу II з чырвонага граніту і бронзы плануецца збудаваць перад
галоўным уваходам у касцёл, размешчаным на плошчы Незалежнасці. Над праектам працуюць
заслужаны архітэктар Беларусі Леанід Левін і народны мастак Беларусі скульптар Іван
Міско. Паводле слоў У.Завальнюка, у рабоце над помнікам возьме ўдзел і польскі
скульптар. Такім чынам, падкрэсліў ён, кампазіцыю будуць ствараць яўрэй, беларус і
паляк, якія прадстаўляюць іудаізм, праваслаўе і каталіцызм, што сімвалізуе супрацоўніцтва
людзей розных нацый і веравызнанняў. За такое супрацоўніцтва заўсёды выступаў
Ян Павел II, зазначыў У.Завальнюк.