(23.02.2009 RV)Të luftohen efektet e dëmshme të krizës aktuale ekonomike, me
rregulla më të rrepta financiare, për të parandaluar përsëritjen e kësaj situate në
të ardhmen. Ky është mendimi i njëzëshëm, që doli nga takimi i vendeve të G8-ës plus
Spanjën e Hollandën, në Berlin. Mbledhja u bë për të përgatitur takimin më të zgjeruar
G20, në prill, në Londër. Italia, Franca, Gjermania, Britania e Madhe, Spanja
e Hollanda përvijuan disa linja të përbashkëta për mbikqyrjen e të gjitha produkteve
financiare dhe për të kundërshtuar krijimin e të ashtuquajturave “parajsa fiskale”.
Të gjithë dakord edhe mbi nevojën e rritjes së burimeve për Fondin Monetar Ndërkombëtar.
Gjithçka çon drejt rishikimit të rregullave për tregjet financiare, duke mbrojtur
parimin e konkurrencës, por duke shmangur ekxtremet, që sollën krizën ekonomike botërore.
Të dëgjojmë parashikimin e Hosè Angel Gurria, sekretar i përgjithshëm i Organizatës
për bashkëpunimin dhe zhvillimin ekonomik: “Do të jetë një vit shumë, shumë
i vështirë, e të shohim nëse – siç thuhet - do të shihet drita në fund të tunelit,
në vitin 2010, por të shpresojmë sidomos të vemë rregull në sistemin financiar, pasi
ky i fundit, sot, vazhdon të jetë një pengesë e jashtëzakonshme”. Jo vetëm
G20-a në Londër, por edhe mbledhja e ardhshme e G8-ës, që do të zhvillohet në korrik
në Itali, konsiderohet si një nga takimet e rëndësishme për marrjen e masave kundër
krizës. Kryeministri italian propozoi në Berlin një takim edhe me presidentin amerikan,
Barak Obama. Mbi përparësitë e G8-ës, të dëgjojmë zv.sekretarin italian në Ministrinë
e Jashtme, Vinçenco Skoti: “G8-a do të merret jo aq me masat e menjëhershme,
se sa me ato të perspektivës, pra me politikat e zhvillimit, duke parë jo vetëm vendet
e e industrializuara, por duke marrë përsipër edhe problemin e vendeve më të varfëra,
që po vuajnë më shumë nga kriza. Do të diskutohen edhe aspekte politike - duke filluar
nga Afganistani - probleme që kanë të bëjnë me mospërhapjen e armëve”. Kujdesi
i veçantë për vendet më pak të zhvilluara nuk është thjesht çështje bamirësie. Ndikimi
i krizës mbi ta mund ta kapërcejë aspektin humanitar, siç pohon drejtoresha ekzekutive
e Programit Ushqimor Botëror, Zhozetë Shiran: “E kemi për detyrë njerëzore
të ndihmojmë ata që ndodhen në vështirësi. Përsa u përket varfërisë e urisë, çështja
e kapërcen këtë ndjet të thjeshtë. Në fakt, jetojmë në një botë të ndërlidhur e, nëse
një pjesë e njerëzimit nuk ka ushqim, efekti do të jetë destabilizues për pjesën tjetër.
Prandaj, nëse nuk arrijmë të veprojmë për mëshirë, të paktën të veprojmë në mënyrë
egoiste për një botë më të qëndrueshme”.