(20.2.2009 RV. nga ATSH-ja)Ekspozita "Nderim viktimave të sistemit komunist",që
u hap sot në Tiranë, nën kujdesin e Kryeministrit Sali Berisha, solli në memorien
e gjithkujt 20 Shkurtin e vitit 1991, një ditë që na ndan nga e kaluara, dita
që përkujton ata që provuan në lëkurë moralin e një shoqërie ku diktatura vret e dënon
me vdekje deputetë, poetë, arsimtarë, njerëz të letrave, fjalën e lirë. Kjo
ditë e shpallur si "Dita kombëtare e nderimit të viktimave të komunizmit", kurorëzoi
sot ekspozitën më të madhe në vend, detajet rrënqethëse që sjellin në memorie vuajtjet
dhe masakrat e diktaturës Enveriste përgjatë viteve 1943-'90, të publikuara në hollin
e Muzeut Historik Kombëtar. Një instalacion i përbërë nga një gardh me tela
me gjemba 15-metra i gjatë dhe 3-metra i lartë, është pozicionuar në qendër të kësaj
ekspozite, element që sjell një fragment të vogël të mijëra shqiptarëve që vuajtën
në burgjet dhe kampet e punës. Ky instalacion rrethohet në mënyrë lineare
me printime të fotografive origjinale në cilësi të lartë, bardhë e zi, që dokumenton
skenat rrënqethëse të realizmit socialist, të cilat qarkojnë ekspozitën të kthyera
në foto instalacione me ndriçim nga pas. Të gjitha këto shoqërohen me projeksione
filmike, të cilat shfaqin momente të përshkallëzimit të dhunës dhe krimeve të kryera
gjatë gjithë periudhës në fjalë, të cilat së bashku me foto-instalacionet janë materiale
pamore origjinale që shfaqen për herë të parë. Ekspozita përqendrohet në rend
kronologjik në ngjarjet kryesore të periudhës së social-realizmit, që fillon me krimet
e komunizmit në nëntor 1944, kryqëzimi inteligjencës dhe shtypja e qëndresës dhe mendimit
të lirë, linçimi i fesë dhe i klerit, vrasjet masive dhe djegiet, asgjësimi i intelektualëve
dhe torturat makabre të armiqve të popullit, vrasjet në kufi në vitet 89-91, etj. 6535 viktima mbetën të pushkatuar e të vdekur në burgjet e komunizmit. U internuan,
torturuan në mënyra çnjerëzore mijëra të tjerë, me qëllim që t'i çonin në çmendi ata
të cilët guxuan t'i kundërvihen sistemit, sistem që nuk kurseu as edhe një.
Në çeljen e ekspozitës ministri Kulturës z. Ylli Pango u shpreh se, "Është data 20
shkurt, data e rrëzimit të simboleve komuniste, data që qeveria shqiptare ka vendosur
ta përkujtojë gjithmonë si dita e nderimit të viktimave të shumta të komunizmit shqiptar
të diktaturës më gjakësore që njeh Europa". "Prandaj jemi përpjekur në këtë
ekspozitë të paraqesim në rend kronologjik vitet e luftës e deri në telat me gjëmba
të viteve 90-të, tmerret e diktaturës. Jemi përpjekur të japim rrathët egoncetrik
të ferrit komunist, të përkujtojmë të gjithë viktimat, martirët që përjetuan në këtë
epokë skëterrin e një sistemi të egër duke besuar se shpirtrat e tyre ndodhen sot
në qiell", shtoi ministri Pango. Fondi i kësaj ekspozite do të integrohet
dhe do të jetë bërthama e një pavioni të përhershëm në MK, për t'u transferuar në
një muze të ardhshëm vetëm për genocidin e periudhës në fjalë. Krahas muzeut është
menduar të ndërtohet dhe një obelisk, i cili do të vendoset në sheshin përballë Qëndrës
Ndërkombëtare të Kulturës "Arbnori", në Tiranë. Për realizimin e kësaj ekspozite
kontribuan Agjensia Telegrafike Shqiptare, Arkivi Qëndror i Shtetit, Arkivi Ministrisë
së Brendshme, Arkivi i Filmit Dokumentar të televizionit Shqiptar, Arkivi Qëndror
Shtetëror i Filmit, Instituti Përndjekurve Politikë, Komiteti Kulteve, Galeria Kombëtare
e Arteve, Muzeu Historik Kombëtar, Qendra e Studimeve Albanologjike, etj.
Statistika të viktimave të sistemit komunist, publikuara nga MTKRS: 1.
Të pushkatuar 5548 Nga këta 91
gra 2. Të burgosur 14563 Nga këta
445 gra 3. Të vdekur në burg 987 Nga këta
7 gra 4. Të futur në psikiatri 308 Nga këta
35 gra 5. Të internuar e dëbuar 21401 Nga këta
322 gra Gjithsej të pushkatuar e të vdekur në burgjet e komunizmit numërohen
6535 viktima. Prej tyre numërohen klerikë katolikë 120 persona, myslimanë 60 persona,
bektashinj 83 persona, ortodoksë 39 persona. Teksa u shkatërruan dhe u mbyllën 2169
institucione fetare, prej të cilave 740 xhami, 608 kisha e manastire ortodokse, 157
kisha e manastire katolike, 530 teqe e tyrbe.