Papa IFAD-it: të mbështetet zhvillimi bujqësor për të çrrënjosur varfërinë dhe urinë
(20.02.2009 RV)Çrrënjosja e varfërisë
dhe e urisë në botë nuk është utopi, por detyrim për të gjithë bashkësinë ndërkombëtare.
Kështu tha Papa Benedikti XVI sot paradite, në audiencën me drejtuesit e Fondit ndërkombëtar
për zhvillimin bujqësor (IFAD). Organizata e OKB-së feston 30 vjetorin. Ati i
Shenjtë u ndal veçanërisht në krizën ekonomike botërore dhe në rolin e IFAD-it për
të gjetur strategji të reja afatgjata, të afta t’i bëjnë ballë pasigurisë ushqimore
dhe paqëndrueshmërisë së çmimeve. Është e nevojshme që vendet e pasura të bashkëpunojnë
me vendet e varfëra, theksoi Papa Racinger. Është e nevojshme që të krijohen mundësi
të reja pune brenda bashkësive fshatare, në mënyrë që ato të bëhen gjithnjë e më të
pavarura nga fondet e jashtme. Benedikti XVI përmendi veçanërisht projektet e “kreditit
rural”, që kanë për qëllim të ndihmojnë bujqit e vegjël dhe fshatarët pa tokë:
“These projects also help indigenous communities… “Këto projekte ndihmojnë
gjithashtu bashkësitë e vendit për t’u zhvilluar në tokën e tyre dhe për të jetuar
në harmoni me kulturën e tyre tradicionale, në vend që të detyrohen të emigrojnë për
të kërkuar punë në qytete të superpopulluara, plot probleme shoqërore, ku shpesh duhet
të durojnë kushte jetese shumë të këqia”. Organizatat jo qeveritare, nënvizoi
Ati i Shenjtë, mund të japin një kontribut të çmuar për përmirësimin e gjendjes. Disa
prej tyre janë të lidhura ngushtë me Kishën Katolike e impenjohen në zbatimin e doktrinës
shoqërore të saj. Ndër parimet themelore të kësaj doktrine është ai i ndihmës, sipas
së cilës “çdo grup i shoqërisë është i lirë të japë kontributin e vet për të mirën
e të gjithëve”: “All too often, agricultural workers… “Tepër
shpesh, fshatarëve të vendeve në zhvillim u mohohet kjo mundësi, kur puna e tyre shfrytëzohet
me grykësi dhe prodhimi dërgohet në tregje të largëta, me pak ose aspak përfitim për
bashkësinë lokale”. Një shoqëri vërtet njerëzore, vazhdoi Papa, do të dijë
si ta çmojë dhe ta shpërblejë ndihmën për sektorin bujqësor, i cili nëse mbështetet,
i ka të gjitha mundësitë për ta nxjerrë një komb nga varfëria dhe për ta zhvilluar
atë më tej. Është i nevojshëm një bashkëpunim më i madh në familjen njerëzore, për
të garantuar shfrytëzimin e barabartë të pasurive të Tokës, sot e në të ardhmen: “The
motivation to do this comes from love… “Motivi për ta bërë këtë vjen
nga dashuria: dashuria për të varfërit, dashuria që nuk mund të tolerojë padrejtësinë
dhe privimet, dashuri që nuk është në paqe derisa varfëria e uria të mos zhduken nga
jeta e njerëzimit. Objektivi për të çrrënjosur varfërinë ekstreme dhe urinë, ashtu
si edhe promovimi i sigurisë ushqimore dhe i zhvillimit të fshatit, larg së qeni tepër
ambicioz apo jo real, bëhet, në këtë kontekst, një imperativ i detyrueshëm për krejt
bashkësinë ndërkombëtare”.