(17.2.2009 RV)Në Francë, Komiteti katolik kundër urisë e për zhvillim (CCFD/Toka
solidare) i fton besimtarët të kontribuojnë bujarisht në favor të të varfërve në botë
në kohën e ardhshme të Kreshmëve, përkundra krizës ekonomike. Fushata do të mbahet
në të gjitha famullitë kishtare të Francës nga data 25 shkurt, pra me fillimin e Kreshmëve
të Mërkurën e Përhime e deri më 29 mars, të dielën e Pestë të Kreshmëve. Themeluar
më 1961, Komiteti mbledh me dhjetëra lëvizje katolike që kanë një qëllim të dyfishtë:
realizimin e projekteve konkrete të solidaritetit në Botën e Tretë dhe njëkohësisht
sensibilizimin e opinionit publik, sidomos atij katolik, mbi realitetet e mbi shkaqet
e nënzhvillimit në botë. Në një komunikatë për agjencinë Apik, vepra bamirëse humanitare
përkujton se kriza aktuale ekonomike botërore është duke dobësuar edhe më tepër ata
që janë më të lëndueshëm ( janë më të prekshëm) dhe ka rritur numrin e personave që
vuajnë nga uria në botë nga 850 në 925 milionë. Nga ky fakt buron thirrja për të zbatuar
në mënyrë konkrete solidaritetin me më të varfërit. Shuma e parave që do të mblidhet
nga Fushata e Kreshmëve – shpjegon Komiteti – do të mundësojë financimin çdo vit të
mëse 500 nismave e projekteve në tetëdhjetë Vende. Nismat kanë për qëllim të ndërhyjnë
në mënyrë efikase e afatgjatë kundër urisë e varfërisë.