75 ipeshkvij shtegtojnë tek varri i Shën Palit në Romë
(13.02.2009 RV)75 ipeshkvij nga 40 vende të ndryshme te botës, të cilëve u
printe kardinali Miloslav Vlk, kryeipeshkëv i Pragës, shtegtuan dje në Bazilikën Papnore
të Shën Palit jashtë mureve në shenjë devocioni për Apostullin e Krishtit. Shtegtimi,
bërë në kuadrin e kremtimeve të Vitit kushtuar Shën Palit përkoi edhe me takimin e
Lëvizjes së Vatrorëve me temën “Krishti në qendër të shoqërisë”. Shtegtarët i priti
kardinali Andrea Kordero Lanca di Montexemolo, i cili u shpjegoi miqve synimet e vitit
kushtuar Apostullit të Popujve,- siç njihet ndryshe Shën Pali,- si edhe historinë
e kësaj bazilike. Më pas ipeshkvijtë shtegtarë dhe kardinali Andrea Kordero Lanca
di Montexemolo u lutën së bashku duke medituar pikërisht mbi dy pjesë të Letrave të
Shën Palit drejtuar Korintasve.