Papa në Engjëllin e Tënzot: lutem për të sëmurët, posaçërisht për ata që nuk mund
të kujdesen për veten. Thirrja e Benediktit XVI për Madagaskarin, goditur nga dhuna
e protestat.
Megjithëse është pjesë e përvojës njerëzore, me shumë vështirësi ne pajtohemi me sëmundjen
sepse "thellësisht" jemi "krijuar për jetën". Kështu pohoi dje Papa Benedikti XVI
gjatë lutjes së Engjëllit të Tënzot në Sheshin e Shën Pjetrit në Vatikan, duke reflektuar
mbi Ungjillin e liturgjisë të së dielës, që e paraqet Jezusin të impenjuar në misionin
për shërimin e të sëmurëve. Papa Racinger e përfundoi Engjëllin e Tënzot duke iu lutur
Zotit për të sëmurët – e në mënyrë të posaçme për ata "që nuk munden të kujdesen për
vetveten" – si edhe kërkoi kthimin e rivendosjen e "bashkëjetesës civile" në Madagaskar,
trazuar nga problemet politike e turbullirat shoqërore. Krishti, përveç se është
mjek i shpirtit, është edhe mjek i trupit: ky është mesazhi i pjesës së Ungjillit
të kësaj së diele që kaloi. Një qytet i tërë, Kafarnaumi grumbullohet tek pragu i
shtëpisë së Simon Pjetrit, ku Jezusi posa e ka shëruar të vjehrrën. "Eksperienca e
shërimit të të sëmurve zë një pjesë të mirë të misionit publik të Jezusit – vërejti
Benedikti XVI gjatë lutjes së Engjëllit të Tënzot – e na fton edhe një herë të reflektojmë
mbi kuptimin e mbi vlerën e sëmundjes në çdo situatë në të cilën njeriu mund të gjendet".
E kjo shtoi Papa, pse: "Megjithëse sëmundja bën pjesë në përvojën njerëzore,
ne nuk arrijmë të mësohemi me të e ta pranojmë, jo vetëm pse nganjëherë bëhet vërtet
e rëndë dhe e rrezikshme, por sepse thellësisht jemi krijuar për jetën, për jetën
e plotë". Me të drejtë, vijoi Papa, 'instinkti ynë i brendshëm' na bën të mendojmë
se jeta plotësohet në Zotin, madje si Jetë e amshuar dhe e përsosur. Këtë përgjigje,
pohoi Ati i Shenjtë Racinger, " e gjejmë në Ungjill": " Jezusi nuk lë asnjë
dyshim: Hyji – fytyrën e të cilit Ai vetë na e ka dëftuar – është Hyji i jetës, që
na liron nga çdo e keqe. Shenjat e kësaj fuqie të dashurisë janë shërimet (…) Them
se këto shërime janë shenja, që na udhëheqin drejt mesazhit të Krishtit, na udhëheqin
drejt Zotit e na bëjnë të kuptojmë se sëmundja e thellë dhe e vërtetë e njeriut është
mungesa e Zotit, burimi i së vërtetës dhe i dashurisë. E vetëm pajtimi me Zotin mund
të na dhurojë shërimin e vërtetë, jetën e vërtetë, sepse jeta pa dashuri e pa të vërtetën
nuk do të ishte jetë e plotë(..) Prandaj, kuptohet se pse predikimi i Jezusit e shërimet
që Ai bën, janë përherë të lidhura: në të vërtetë formojnë një mesazh të vetëm shprese
e shpëtimi". Në vazhdim të lutjes së Engjëllit të Tënzot, Benedikti XVI kujtoi
Ditën Botërore të të sëmurit, që bie të mërkurën e ardhshme dhe takimin e tij me të
sëmurët, që do të mbahet në Bazilikën e Shën Pjetrit më 11 shkurt, pasdite, në mbarim
të Meshës së Shenjtë, të cilën do ta kryesojë kardinali Havier Barragan. E si në Mesazhin
e tij për Ditën e të sëmurit, që u shpall të shtunën e kaluar, dje, Papa përsëri falënderoi
dëshmitarët e "dashurisë e të bamirësisë vëllazërore", në mënyrë të veçantë bashkësitë
e krishtera, që përkujdesen për shërbimin dhe shërimin e të sëmurëve: "Është
e vërtetë: sa të krishterë – meshtarë, rregulltarë e laikë – kanë ofruar e vazhdojnë
t'ia ofrojnë në çdo pjesë të botës duart, sytë dhe zemrat e tyre Krishtit, mjekut
të vërtetë të trupave e të shpirtrave të njerëzve! Të lutemi për të gjithë të sëmurët,
në mënyrë të posaçme për ata që janë të sëmurë rëndë, që në asnjë mënyrë nuk mund
të përkujdesen për veten, por janë krejtësisht të varur nga kujdesi i të tjerëve:
uroj që çdonjëri prej të sëmurve të mund ta përjetojë, përmes kujdesit të atij që
ka pranë vetes, fuqinë e dashurisë së Zotit e pasurinë e hirit të tij, që shpëton". Pas
Engjëllit të Tënzot, vijoi një lutje tjetër e Papës Benedikti XVI, i cili tha se bashkohet
me ipeshkvijtë e Madagaskarit e me Ditën e tyre të lutjes për "pajtimin kombëtar e
drejtësinë sociale në vend". E lutja e Papës u shndërrua në thirrje: "Të shqetësuar
fort për periudhën posaçërisht kritike, që po kalon vendi, ju ftoj të bashkoheni me
katolikët malgashë për t'ia besuar Zotit të vdekurit, që kanë shkaktuar manifestimet
e protestat në Madagaskar, e për të kërkuar prej Tij, me ndërmjetësimin e Nënës së
Shenjtë, Virgjërës Mari, kthimin e pajtimit në shpirtra dhe rivendosjen e qetësisë
shoqërore e bashkëjetesës civile".