Reflektim i Atë Federiko Lombardit. “Çmimi i unitetit’.
Pas tensioneve ereagimeve të shumta, që shkaktoi Dekreti i kohëve të fundit
i Kongregatës për Ipeshkvijtë, me të cilin u hiqet shkishërimi katër ipeshkvijve të
Vëllazërisë së Shën Piut X dhe në lidhje me deklaratat e imzot Uiljamson, të së njëjtës
Vëllazëri, që mohojnë ose e reduktojnë Shoah, duke iu përgjigjur kancelares gjermane
Angela Merkel, që i konsideronte të pamjaftueshme sqarimet e Vatikanit për heqjen
e shkishërimit ipeshkvit lëfevrian Uiljamson, që mohoi Shoah, të mërkurën e kaluar
Atë Federiko Lombardi theksoi: “Nuk mund të ishte më i qartë’ dënimi nga ana e Papës
i deklaratave që mohojnë Holokaustin”. Po të mërkurën Sekretaria e Shtetit të Vatikanit
bëri të njohur një notë të posaçme për këtë problem, të cilit i kushtohet përsëri
reflektimi i fundjavës i drejtorit tonë të përgjithshëm, Atë Federiko Lombardi:
“Ndërsa
qetësohen dalë-ngadalë ujërat, pas diskutimeve të ditëve të kaluara, po reflektojmë
paksa për të ardhmen. Në të vërtetë, gjesti bujar i Papës për t’ua hequr shkishërimin
katër ipeshkvijve të shuguruar njëzet vjet më parë nga imzot Lëfevrë, nuk shikonte
mbrapa, në të kaluarën e dhimbshme, që ai e njihte fare mirë, me që pikërisht kardinali
Racinger qe asokohe protagonist i përpjekjeve – për fat të keq të dështuara – për
të shmnagur shkëputjen. Gjesti shikonte e vijon të shikojë përpara. Por na e u desh
ta provojmë edhe një herë sa e vështirë e impenjative është rruga drejt bashkimit
e ndoshta tani mund ta kuptojmë edhe më mirë çfarë çmimi duhet paguar për ta fituar. Dora
e shtrirë e Papës mbetet për të gjithë një shembull i admirueshëm përvujtërie, guximi
e përkushtimi për çështjen e unitetit, që i merr parasysh edhe rreziqet. E rreziqet
u ndjenë me gjithë peshën e tyre, për shkak të vështirësive e të paqartësive të rrugës
së ndërmarrë e të rrethanave të pafavorshme, të panjohura ose të parashikuara.Por
pikërisht për këtë, vështirësia bëhet thirrje për të gjithë. Për bashkëpunëtorët e
Papës e për anëtarët e Kishës, që të mos tërhiqen mbrapa – të trembur, të çorientuar
ose të ngrirë në qëndrimet e tyre – në çastin e vështirësisë, duke e lënë vetëm përballë
sfidës; por edhe për bashkëbiseduesit e dialogut të pajtimit, të vënë pa dyshim përballë
kërkesave reale të një rruge, që duhet bërë me përvujtëri e gatishmëri ungjillore
edhe nga ana e tyre, për të rindërtuar kështu bashkimin. Ashtu si herët e tjera, prova
– a të themi kriza - mund të jetë shkas i disfatës, por mund të jetë edhe shkas i
rritjes, i një hapi përpara. Drejt një Kishe, që nuk do të jetë më e fuqishme seç
ishte më parë, por më përvujtërisht e aftë për të treguar se është vend i dashurisë
e i faljes së dhuruar e të pranuar në Krishtin. Në një vend të tillë, Koncili e Tradita
sigurisht nuk mund të kundërshtojnë njëri-tjetrën”.