Liturgjia e Fjalës së Zotit e dielës së 5-të gjatë vitit ‘B’
(07.2.2009 RV)Ja përsëri në takimin
tonë javor të së shtunës me Fjalën e Zotit të së dielës, kësaj here do të dëgjojmë
e meditojmë së bashku leximet biblike të liturgjisë së Fjalës së Zotit të dielës së
5-të gjatë vitit kishtar, ciklit të dytë, sipas kalendarit liturgjik të kishës. Leximeve
biblike të kësaj së diele e tërheqin vëmendjen tonë mbi problemet e rënda e njerëzisht
të pazgjidhshme, atë të dhimbjes e të vuajtjes, të cilat Krishti duke u mishëruar
ka ardhur t'i bashkëjetoi e ndajë me ne dhe të na mësoj çfarë do të thotë ta duash
tjetrin, të afërmin. Lajmi i mirë i shpallur nga Jezusi nuk e eliminon (zhduk)misterin
e së keqes por në zemër të njeriut e ndez shkëndijën e shpresës në një Zoti që është
afër dhimbjes së njeriut. Para jo shumë kohe, në festën e Krishtlindjes
kemi kremtuar misterin e Mishërimit të Jezu Krishtit Zot dhe ende nuk kemi hyr në
misterin e Pashkëve, do të thotë në misterin e mundimeve, të vdekjes e ngjalljes së
Jezu Krishtit Zoti. Tema kryesore e kësaj së Diele mbi dhimbjen dhe vuajtjen përkon
mirë me këtë perspektivë, sepse ndalet mbi vuajtjen njerëzore, të cilën Krishti e
ka marrë mbi vete dhe e ka përjetuar thellësisht në trupin e vet gjatë tërë jetës
së tij, me dashuri hyjnore, për ta shëlbuar e për t'i dhënë domethënie pozitive,
kuptuar si rikuperim të njeriut e të marrëdhënieve të tija me Zotin e me të afërmin.
Leximi i parë i kësaj së diele është marrë nga libri i Jobit (7,1-4.6.7), është një
meditim i mprehtë mbi dhimbjen njerëzore. Një fakt është i pamohueshëm: jeta njerëzore
lëviz brenda një kornize të vuajtjes e të paqëndrueshmërisë. Njeriu mund të shkoj
në hënë e të shpik kompjutera, mirëpo – sikur thotë Jobi – “Jeta e tij është avull”,
e megjithatë – sikur pohon psalmisti – “ Njeriu është porsi lulja e fushës. Sot është
e bukur, por nesër thahet e nuk ekziston më”. Jobi, njeri i sprovuar prej shumë
vuajtjesh, shpreh dëshpërimin e vet e i drejtohet Zotit të vet. Për shkak të kushteve
të vështira të dhimbjes në të cilën gjendej, Jobi në njërën prej ankimeve të tija
shpreh vuajtjen e tmerrshme fizike, vuajtjen morale, e përjeton domethënien e kalimit
të shpejt të jetës tokësore dhe frikën se me vdekje gjithçka përfundon në ekzistencën
e njeriut. Dhe posa thekson lutjen e shpresës mbështetur vetëm në Zotin.
Në leximin e dytë (1Kr 9.16-19.22-23), Pali apostull në letrën drejtuar Korintianëve
ripohon me forcë se ka përvetësuar vuajtjen njerëzore duke u bërë krejtësisht gjithçka
me të gjithë në mënyrë të veçantë me më të dobëtit, jo në saje të nismës apo të ambicies
personale por pasi është kthyer në Krishtin e në saje të forcës ungjillore të cilën
e ka fituar falas prej Hyjit. Pali e kumton Ungjillin me plotë përkushtim e gëzim
pa kërkuar asnjë privilegj apo dobi materiale. Pjesa e Ungjillit të kësaj
së diele nga Maku (1,29-39) na paraqet një ditë të zakonshme të Jezusit, kushtuar
lutjes, predikimit, shërimit të zemrave të njerëzve. Të dielën e kaluar e pamë Jezusin
duke vepruar në sinagogë në Karfarnaum; tani – thotë ungjilltari – Ai del nga sinagoga
e shkon në shtëpi të Pjetrit. Pse? Sepse hapësira e Zotit është gjithkund: në tempull
e jashtë. Mrekullitë e para të Jezusit në Kafarnaum, në fillim të veprimtarisë së
tij publike, paraqiten si shenja e zbatim të misionit të tij për lirimin e njeriun
e të gjithë njerëzve nga çdo gjë që i bënë të vuajnë e t’ia ndryshojë kuptimin e ekzistencës
së tyre. Edhe për Atë fuqia e orientimi vijnë prej Atit Qiellor dhe ushqehen prej
lutjes drejtuar Zotit. Jezusi bëhet gjithçka për të gjithë njerëzit për t’ua lehtësuar
vuajtjet, por di edhe të rezervoj për vete kohën e heshtjes e të lutjes. Shembulli
i Jezusit për çka flet pjesa e ungjillit të kësaj së diele, është mësim për ne se
t’u shërbesh të tjerëve do të thotë ti shërbesh Zotit, i cili shërbehet me Jezusin
për të arritur tek të gjithë bijtë e vet, në të vërtetë Jezusi është shembull për
t’u imituar, e ne sot duhet të jemi duart e tij, sytë e tij, këmbët e tij, zemra e
tij për të tjerët....është një lutje që thotë kështu: Krishti nuk ka duar, Ka
vetëm duart tona për ta kryer punën e vet sot. Krishti nuk ka këmbë Ka vetëm
këmbët tona për t’i tërhequr njerëzit pranë vetes. Ne jemi Bibla e vetme të cilën
të gjithë popujt akoma e lexojnë Ne jemi thirrja e vetme e Zotit shkruar me fjalë
e me vepra Krishti nuk ka gojë Ka vetëm gojën tonë për t’u folur sot njerëzve Krishti
nuk ka mjete Ka vetëm ndihmën tonë për t’i sjell njerëzit tek vetja Krishti
nuk ka duar, nuk ka këmbë, nuk ka gojë, nuk ka mjete, por të ka ty. Për të dashur,
shërbyer e bërë mirë. E tani ti dëgjojmë së bashku leximet biblike të kësaj së
diele e pastaj komentin..