Mesazhi për Krezhmët 2009. Papa fton të rizbulohet agjërimi i vërtetë i krishterë,
që të nxit t’ia hapësh zemrën Zotit e të afërmit.
(03.02.2009 RV)Agjërimi i vërtetë
ka për qëllim të na nxisë të mos jetojmë më vetëm për vetveten, por t’ia hapim zemrën
Zotit e të afërmit: këtë pohon Benedikti XVI në Mesazhin për Krezhmët e këtij viti,
përmes të cilit na fton ta rizbulojmë këtë praktikë të lashtë pendestare.
Papa
fton të rizbulohen vlera dhe arsyet e agjërimit të krishterë. Nuk është fjala për
një praktikë moralistike, për zbatimin e përpiktë të ca normave të një ligji fetar,
me zemrën larg Zotit, siç bënin farizenjtë. E aq më pak për një masë, që ka për qëllim
t’i shërbejë shëndetit të korpit. Agjërimi – pohon Papa – sigurisht i ndihmon mirëqenies
fizike, por për besimtarët është sidomos terapi që shërben për të mjekuar gjithçka
i pengon të bëjnë vullndetin e Zotit. Në të vërtetë, ashtu si i thotë Jezusi shejtanit
në përfundim të 40 ditëve të kaluara në shkretëtirë “Njeriu nuk jeton vetëm prej buke,
por prej çdo fjale që del nga goja e Hyjit”(Mt. 4,4). Prandaj mund të themi
se agjërimi i mirëfilltë ka për qëllim ta nxisë njeriun të hajë ‘ushqimin e vërtetë’,
që do të thotë të bëjë vullnetin e Atit. Agjërimi i trupit shndërrohet në uri e etje
për Zotin. Është një formë asketike, që na ndihmon për t’u larguar nga mëkati e për
t’u afruar tek Zoti, siç porosiste Shën Agostini, që i njihte mirëfilli prirjet e
veta negative, të cilat i quante lëmsh i ngatërruar e i kapërthyer. Kjo praktikë asketike
bëhet armë shpirtërore për të luftuar kundër çdo lëshimi që mund t’i bëjmë vetvetes.
Heqja dorë vullnetarisht nga kënaqësia e të ngrënit dhe nga të mirat e tjera materiale
– nënvizon Benedikti XVI - e ndihmon dishepullin e Krishtit t’i kontrollojë lakmitë
e natyrës së ligështuar nga mëkati i rrjedhshëm, pasojat negative të të cilit ndikojnë
mbi gjithë personalitetin e njeriut. Prej këndej ftesa për thjeshtësi, ashtu si na
nxit një himn i lashtë i liturgjisë krezhmore: “T’i përdorim me masë fjalët, ushqimet,
pijet, gjumin e lojrat, të tregohemi më të kujdeshëm, për t’u ruajtur nga mëkati”.
Është fjala për një formë të heqjes dorë nga egoizmi që, e ushqyer nga lutja dhe e
ndjekur nga lëmosha, e ndihmon njeriun t’ia hapë zemrën Zotit e të afërmit. Duhet
të kujtojmë se agjërimi nuk është qëllim në vetvete: agjërim do të thotë të heqësh
dorë vullnetarisht nga diçka, për të ndihmuar të tjerët. Kështu – thekson Papa -
dëshmojmë konkretisht se i afërmi nuk është i huaj për ne. Prej këndej, thirrja drejtuar
famullive e bashkësive kishtare ta mbajnë gjithnjë gjallë mikpritjen e vëmendjen ndaj
vëllezërve e të mbledhin lëmoshë, për t’ia dhuruar të varfërve atë, që është vënë
mënjanë falë agjërimit.