(01.02.2009 RV)Për veprimtarinë e saj shoqërore në Indi, Motra Nirmala Joshi,
Eprore e përgjithshme e Misionareve të Bamirësisë, themeluar nga e Lumja Nënë Terezë,
u nderua me titullin “Padma Vibhushan” (Dekorata e Lotusit ), titulli i dytë i lartë
që jep shoqëria indiane. Deri tani këtë titull e kanë marrë 133 personalitete. Por
asnjë nuk ka arritur të meritojë titullin më të lartë ‘Bharat Rtana” (Xhevahiri i
Indisë), të cilin Vendi i madh aziatik ia dha më 1980 Nënës sonë Terezë, plot mirënjohje
për veprimtarinë e saj të pashembullt në ndihmë të njerëzve më të braktisur të shoqërisë
indiane.
E, po në Indi, për herë të parë një të krishteri iu dha çmimi ‘Harmonia”.
Është fjala për Atë Dominik Emanuel, 57 vjeç, i diplomuar në komunikimet shoqërore,
specialist në fushën e dialogut ndërfetar, misionar e zëdhënës i kryediqoezës katolike
të Nju Delhit. Në motivacionin e çmimit, dhënë misionarit katolik, lexohet: “Impenjohet
me të gjitha forcat për zgjidhjen e konflikteve e të kundërvënieve ndërmjet bashkësive
të ndryshme”. Çmimi - sipas agjesisë Apic - nisi të jepej që më 1996 nga Fondacioni
Kombëtar për harmoninë e përgjithshme, një ent autonom, i lidhur me ministrinë e brendshme
indiane. “Ky çmim - tha atë Emanueli - është domethënës, në një kohë kur disa grupe
duan ta polarizojnë shoqërinë mbi bazën e fesë. Kisha katolike – shtoi - nuk ka të
bëjë fare me prozelitizmin, por ka të bëjë, edhe shumë madje, me përpjekjen për të
vendosur paqen e harmoninë ndërmjet të gjitha feve”.