(30.01.2009 RV)Sukses për Kanalin e Vatikanit në YouTube, që sot mbush një
javë. Duke iu përgjigjur pyetjeve të gazetarëve në Sallën e Shtypit të Selisë së Shenjtë,
drejtori, atë Federiko Lombardi deklaroi se “gjatë gjashtë ditëve të para pas hapjes
së kanalit të ri, atë e kanë parë në të katër gjuhët (italisht, anglisht, spanjisht
e gjermanisht) 750 mijë vetë. Analistët e motorrit kërkimor në internet “Google” pohojnë
se nga një krahasim me kanalet kryesore institucionale në nivelin botëror, këto numra,
e aq më shumë numri i të regjistruarve që është 15 mijë vetë, tregojnë se kanali ynë
është në të njëjtin nivel frekuentimi me të tjerët, të cilët janë hapur kohë më parë
e pra, janë më të konsoliduar e me arkiva më të mëdha”. Atë Lombardi sqaroi se mesatarisht,
janë publikuar dy videoklipe në ditë. Me rastin e Ditës së Kujtimit të Shoah-ut, janë
publikuar tri videoklipe nga arkivat e Qendrës Televizive të Vatikanit, që paraqesin
ndërhyrjet e Papës Benedikti XVI pikërisht mbi këtë temë. Në këtë mënyrë, përveçse
videolajmet e ditës, kanë filluar të publikohen në YouTube edhe disa video historike.
Kujtojmë se kanali i ri, që mund të konsultohet nga kushdo në internet, mbahet me
kontributin e Qendrës Televizive dhe të Radio Vatikanit. Ai bën të njohur aktivitetin
e Papës dhe të Kishës Katolike në botë, duke përdorur burimet e drejtpërdrejta dhe
tekstet e plota të fjalimeve e të dokumenteve.