У віншавальнай тэлеграме чытаем запэўненьне Сьвяцейшага Айца аб малітве за новага
Патрыярха. Бэнэдыкт 16 просіць Бога шчодрае мудрасьці для кіраўніка Рускае Праваслаўнае
Царквы, каб распазнаў Божую волю і служыў з любоў”ю давераным яму вернікам, падтрымліваючы
іхнюю вернасьць Эвангэльлю ды вялікім традыцыям расейскага праваслаў”я. Папа жадае
Патрыярху Кірылу Божага Блаславенства ў зьбераганьні еднасьці паміж Праваслаўнымі
Цэрквамі і ў імкненьні да поўнага адзінства, якое ёсьць мэтаю каталіцка-праваслаўнага
супрацоўніцтва і дыялогу. Запэўнівае аб сваёй духоўнай блізкасьці і аб гатоўнасьці
католікаў да супрацоўніцтва з расейскім праваслаў”ем з мэтаю даваць што-раз больш
выразнае сьведчаньне аб праўдзе хрысьціянскага пасланьня ды аб зьвязаных з імі вартасьцях. “Мы
молімся, каб Патрыярх Рускае Праваслаўнае Царквы надалей адкрыта, адважна, шчыра і
клапатліва прамаўляў да сьвету- напісаў у віншавальнай тэлеграме да Патрыярха Кірыла
Гэнэральны Сакратар Сусьветнае Рады Цэркваў. Пастар Самгэль Кобія прыпомніў, што
дагэтуляшні Мітрапаліт Смаленскі і Калінінградзкі ёсьць добра вядомым ў экумэнічным
асяроддзі. Бо ж у 70-х гадах быў пастаянным прадстаўніком Рускае Царквы ў гэтай арганізацыі.
Пастар Кобія дацэньвае ягонае заангажаваньне ў дыялог, добрае веданьне сітуацыі, а
таксама крытычнае, але канструктыўнае стаўленьне. Мае затым надзею, што новы Патрыярх
прычыніцца да набліжэньня ўзаемных адносін паміж падзеленымі Цэрквамі. Таксама
Прэзыдэнт ЗША, Барак Обама пажадаў Кірылу посьпехаў у ажыўліваньні багатае духоўнае
традыцыі Рысеі ды заахвоціў да міжрэлігійнага дыялогу, які- як падкрэсьліў Обама-
ёсьць найважнейшым для ўсіх шматэтнічных грамадзтваў. З Ватыкану ў інтранізацыі
новага Патрыярха, якая адбудзецца ў нядзелю 1-га лютага ў Маскве, прыйме ўдзел кардынал
Вальтэр Каспэр, старшыня Папскае Рады да Спраў Падтрымліваньня Адзінства Хрысьціян.