Përvoja e Seminarit ndërdioqezan të Shkodrës për përgatitjen e meshtarëve të rinj.
(30.01.2009 RV)Kohët e fundit në Romë u organizua një tryezë e rrumbullakët,
gjatë së cilës u shkëmbye përvoja e punës baritore në familje e në gjirin e të rinjve,
lidhur me thirrjet e reja për rrugën e meshtarisë. Tema ishte një frazë e shkëputur
nga Letra e Shën Palit drejtuar mikut të tij, Timoteut: “E di kujt i kam besuar’.
Zgjedhja e rrugës së meshtarisë, ndërmjet frikës e besimit” . Është fjala për besimin
që duhet të ketë i riu në thirrjen e Zotit, e cila i hap një rrugë sa të vështirë,
aq edhe të bukur, në shërbim të shëlbimit të shpirtrave. Në këtë takim ishin të
pranishëm përfaqësues të familjeve, të të rinjve e të seminaristëve, ardhur nga seminare
të ndryshme të botës, ndërmjet të cilëve, edhe dy diakonë, që përgatiten në seminarin
ndërdioqezan të Shkodrës “Zoja e Këshillit të Mirë”. Kujtojmë se Seminari Papnor
i Kishës katolike në Shkodër, u hap për herë të parë më 2 gusht 1859, për t’u mbyllur
pastaj njëherësh me Kishat e vendet e tjera të kultit, më 1967. U hap përsëri më 1990
e u përurua më 17 tetor 1990. Po flasim sot me dy diakonët. Quhen Gabriel Grabanica
e Simon Filipaj: