Presidenti i Bankës Qendrore Evropiane lajmëron në Forumin e Davosit se mund të ketë
zbritje të mëtejshme të interesave bankare.
(29.01.2009 RV)Përsëri kriza ekonomike ndërkombëtare në qendër të përpjekjeve
për përmirësimin e situatës botërore. Presidenti i Bankës Qendrore Evropiane lajmëroi
në Forumin e Davosit në Zvicër se mund të ketë zbritje të mëtejshme të interesave
bankare që aktualisht janë në 2 përqind. Nga ana tjetër Organizata botërore e punës
dha alarmin për humbjen e 50 milionë vendeve të punës dhe për varfërimin e mëtejshëm
të popullsive. Po ashtu edhe Fondi Monetar Ndërkombëtar thotë se nuk do të ketë rritje
ekonomike deri në 2010. Mbi të dhënat e këtyre organizmave ndërkombëtare të dëgjojmë
Alberto Kuadro Kurcio, ekonomist pranë Universitetit katolik të Milanos:
Përgjigje:
Padyshim që kriza ka përfshirë gjithë globin dhe të dhënat e Organizatës Ndërkombëtare
të Punës janë alarmuese. Natyrisht, nuk mjafton të vihet në dukje gjendja. Do të duhej
që të gjendeshin edhe mjetet për të përmirësuar situatën, gjë që organizmat ndërkombëtare
nuk e bëjnë gjithmonë.
Pyetje: Po ja, organizmat ndërkombëtare - të themi atë
që është, - i kanë kritikuar masat e marra për daljen nga kriza të disa qeverive
të veçanta: i quajnë si të pamjaftueshme. A me të vërtetë qeverive u mungojnë mjetet
për t’i bërë ballë krizës?
Përgjigje: Mendoj se tani për tani është e vështirë
të parashikohen veprime më të fuqishme, edhe pse secili ka ato detyrimet e veta. Sidoqoftë,
mendoj se veprimet do të ishin shumë më frytdhënëse sikur të bashkërendoheshin.