Motër Nirmalës i jepet një nga titujt më të lartë civilë indianë.
(28.01.2009 RV)Për veprimtarinë e saj shoqërore në Indi, Motra Nirmala Joshi,
Eprore e përgjithshme e Misionareve të Bamirësisë, themeluar nga e Lumja Nënë Terezë,
u nderua me titullin “Padma Vibhushan” (Dekorata e Lotusit), titulli i dytë
i lartë që jep shoqëria indiane. Dhënia e titullit u njoftua më 25 janar, në festën
e Republikës. Kujtojmë se lotusi është lulja kombëtare e Indisë. Deri tani
këtë titull e kanë marrë 133 personalitete. Por asnjë nuk ka arritur të meritojë titullin
më të lartë ‘Bharat Rtana” (Xhevahiri i Indisë), të cilin Vendi i madh aziatik ia
dha më 1980 Nënës sonë Terezë, plot mirënjohje për veprimtarinë e saj të pashembullt
në ndihmë të njerëzve më të braktisur të shoqërisë indiane. Gjithsesi, lajmi i
nderimit të Motër Nirmalës u prit me emocion të madh nga Kongregata e Misionarëve
e Misionareve të Bamirësisë. Ndërsa rregulltarja 74-vjeçare me origjinë nepaleze,
që nuk e priste fare këtë titull, pohoi se e ndjen veten shumë të nderuar, por se
merita kryesore u takon krejtësisht Misionarëve të Bamirësisë – motrave e vëllezërve
e njerëzve vullnetmirë që, për lavdi të Zotit, u japin ndihmesën e tyre të pakursyer
të varfërve më të varfër.