Benedikti XVI priti presidentin e ish-Republikës Jugosllave të Maqedonisë
(23.01.2009 RV)Sot paradite Benedikti
XVI priti në audiencë presidentin e ish-Republikës Jugosllave të Maqedonisë, Branko
Crvenkovski, i cili më pas u takua edhe me sekretarin e Shtetit të Vatikanit, kardinalin
Tarçizio Bertone dhe me sekretarin për marrëdhëniet me shtetet, kryeipeshkvin Dominik
Mambertì. “Presidenti – shkruhet në një komunikatë të Sallës së Shtypit të Vatikanit
- shprehu mirënjohjen për vëmendjen që tregoi Selia e Shenjtë ndaj vendit të tij,
që nga çasti kur fitoi pavarësinë. Nënvizoi, më pas, marrëdhëniet e mira që ekzistojnë
ndërmjet dy palëve, gjë që e vërteton edhe vizita e përvitshme e një delegacioni zyrtar
maqedon në Romë, me rastin e festës së Shenjtorëve Qirili e Metodi, ungjillëzues të
popujve sllavë. Gjatë takimit u sintetizua edhe situata në zonë e u shkëmbyen mendime
lidhur me disa çështje që u përkasin të dyja palëve. Takim me interes për të gjitha
vendet ballkanike, posaçërisht për banorët e trevave shqiptare, gjatë të cilit u kujtua
edhe se së shpejti do të bekohet shtëpia-muze e rindërtuar, ku banonte familja Bojaxhiu
e ku lindi Nënë Tereza, e Lumja e parë shqiptare.